Ֆրանսիայի խորհրդարանի պատգամավորները վարչապետին վստահություն հայտնելու քվեարկություն կիրականացնեն
Ֆրանսիայի խորհրդարանի ստորին պալատում սեպտեմբերի 8-ին օրենսդիրները կմասնակցեն վարչապետ Ֆրանսուա Բայրուի հանդեպ վստահության քվեարկությանը։
Բայրուն օգոստոսի 25-ին տեղի ունեցած մամուլի ասուլիսում հայտարարել էր, որ սեպտեմբերի 8-ին Ազգային ժողովում կկայանա կառավարության վստահության շուրջ քվեարկություն։ Դրա նպատակն է՝ ստանալ մանդատ ժողովրդականություն չվայելող տնտեսական բարեփոխումներն անցկացնելու համար, որոնք նախատեսում են խիստ խնայողություններ պետական բյուջեի դեֆիցիտը կրճատելու նպատակով։
Վարչապետի մտահղացմամբ, անհրաժեշտ է պարզաբանել քաղաքական ուժերի վերաբերմունքը նրա տնտեսական ուղեգծի նկատմամբ։ Անվստահության քվեի դեպքում կառավարությունը հրաժարական կտա։
