
Գերմանիայում հակապատերազմական երթի ժամանակ բախումներ են եղել ոստիկանության և ցուցարարների միջև

Գերմանիայի Քյոլն քաղաքի կենտրոնում, շաբաթ երեկոյան՝ օգոստոսի 30-ին, տեղի ունեցած հակապատերազմական երթի ընթացքում տեղի են ունեցել բախումներ ոստիկանության և ցուցարարների միջև, հայտնում է «Գերմանական ալիք»-ը՝ հղում անելով ոստիկանությանը։
«Ապազինել Rheinmetall»-ի նախաձեռնությամբ կազմակերպված բողոքի ակցիան դադարեցվել է՝ իրավապահների դեմ հարձակումների և հավաքների մասին օրենսդրության բազմակի խախտումների պատճառով։
Բռնությունները կանխելու նպատակով ոստիկանությունը կիրառել է արցունքաբեր գազ և մահակներ։
Բախումների հետևանքով տուժել է 12 ոստիկան, որոնցից չորսը ստիպված են եղել դադարեցնել ծառայությունը։ Ցուցարարների ներկայացուցիչը հայտնել է, որ տուժածներ կան նաև ցուցարարների շրջանում։
Հարձակման մասնակիցների խումբը «մեկուսացվել» է ոստիկանության կողմից։ DPA գործակալության թղթակցի դիտարկմամբ՝ ագրեսիվ տրամադրված ցուցարարների միջուկը շրջափակված է եղել մինչև ուշ գիշեր։
Իրավապահները մինչև առավոտյան ժամերը պարզել են այն անձանց ինքնությունը, ովքեր նախնական տվյալներով մասնակցել են անկարգություններին։ Մի քանի մարդ ձերբակալվել է։
Ցուցարարները մեղադրել են ոստիկանությանը՝ որոշ ցուցարարների առանց անհրաժեշտ օգնություն տրամադրման պահելու մեջ։ Ի պատասխան՝ ոստիկանությունը հայտարարել է, որ ձերբակալվածներին տրամադրվել է ջուր և մուտք՝ շարժական զուգարաններ։
Ցուցարարների ներկայացուցիչը երեկոյան հայտնել է, որ 40-ից 60 տուժածի թույլ չի տվել դիմել հիվանդանոց։
Ոստիկանության տվյալներով, ռազմականացման և պատերազմի դեմ անցկացված հակապատերազմական երթին մասնակցել է մինչև 3000 մարդ։ Որոշ ցուցարարներ փակել են դեմքերը դիմակներով և ծխային նռնակներ նետել։ Իրավապահ մարմինների ներկայացուցիչը հայտնել է, որ ուղեկցող մեքենաներից մեկում հայտնաբերվել են հրավառ նյութեր, հրկիզվող սպիրտով տարաներ և գազի բալոններ։