«Փաշինյանն այս մարդկանց «շախ» է հայտարարել, ասում է՝ «ընկե՛ր, կռուտիտ մի՛ եղեք, պետությունը ես եմ, Կառավարությունը ես եմ, դուք էլ նիկոլական եք». Միքայել Նահապետյան

Նիկոլ Փաշինյանը երեկ Կառավարության հերթական նիստից հետո լրագրողների հետ զրույցում հրապարակային հայտարարեց, որ Կառավարություն ինքն է, և եթե Կառավարությունում կա մեկը, ով իր դիրքորոշմանը հակառակ դիրքորոշում կարող է ունենալ՝ պետք է հրաժարական ներկայացնի։ Խոսքն այս դեպքում ՀԷՑ-ի վերաբերյալ Ստոկհոլմի արբիտրաժային դատարանի կայացրած որոշման մասին էր, որի առնչությամբ Նիկոլ Փաշինյանն ասաց. «Ով ասել է, որ Կառավարությունն ընդունել է այդ որոշումը, պետք է հրաժարական ներկայացնի»։

Այսօր առավոտյան արդեն հայտնի դարձավ, որ Նիկոլ Փաշինյանը Միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանին ազատել է աշխատանքից։ Այնուհետև գրասենյակի մամուլի քարտուղար Հասմիկ Սամվելյանն էր ֆեյսբուքյան իր էջում գրել, որ սեփական դիմումի համաձայն՝ դադարեցնում է գործունեությունը գրասենյակում։

Հանրային-քաղաքական գործիչ Միքայել Նահապետյանի բնորոշմամբ՝ այն, ինչը հայ ազգը ստացել է ներքաղաքական գործընթացների արդյունքում, «թալիբան» է, բայց դրա վերաբերյալ փորձում են Բունդեստագի կատեգորիաներով դատողություններ անել։

«Այստեղ գերմանական տիպի քաղաքականություն և դրան բնորոշ քաղաքական չափանիշներ, դատողություններ չկան։ Սա տիպիկ «թալիբանական» կառավարման ոճն է, իսկ այս մարդը «խալիֆ» է, ընդ որում, այս բառին ծանոթ մարդիկ կիմանան, թե ինչու եմ հենց «խալիֆ» ասում։ Այս մարդը երկրի վրա «աշխարհիկ ու հոգևոր միակ և բարձրագույն իշխանությունն է՝ Աստծո փոխանորդը»։ Հայաստանը դարձրել է տիպիկ խալիֆայացրած, բայց փորձում է Եվրոպայի հետ հարաբերություններ պահել, մեկ-մեկ «պուպուշ» բաներ անել։ Բայց Նիկոլ Փաշինյանը՝ որպես քաղաքական գործիչ, իր տրամաբանության մեջ զգում է, որ նախատեսված է «խալիֆ» լինելու համար, «Աստծո և պետության վերջնական խոսքն» ինքը պետք է ասի»։ Հիմա այս պարագայում ինքը կասի՝ Կառավարությունն էլ եմ ես, պետությունն էլ, Աստվածն էլ, ամեն ինչ ասելու է»,- 168.am-ի հետ զրույցում նշեց Միքայել Նահապետյանը։

Այս ամենով հանդերձ, Միքայել Նահապետյանը ողջունում է վերջին շրջանում Նիկոլ Փաշինյանի արած 2 հայտարարություն։ Առաջինը Նիկոլ Փաշինյանի արած «Կառավարությունը ես եմ» հայտարարությունն է, քանի որ երկար ժամանակ այս խոսակցությունը կար, բայց չգիտես՝ ինչու ՔՊ-ում չէին ուզում ընդունել, որ դա այդպես է։

«Այսպես ասած՝ «չեզոք» պետականամետներ» կան, որոնք մշտապես հայտարարում են, թե՝ «մենք Նիկոլ Փաշինյանի կողմից չենք, պետության կողմից ենք»։ Հիմա այս մարդկանց Նիկոլ Փաշինյանը «շախ» է հայտարարել, ասում է՝ «ընկե՛ր, կռուտիտ մի՛ եղեք, պետությունը ես եմ, Կառավարությունը ես եմ, դուք էլ նիկոլական եք»։  Հիմա հետևությունները թողնում եմ՝ այդ մարդիկ անեն։

Երկրորդ բանը, որ մենք երկար ժամանակ պնդում էինք, իսկ Նիկոլ Փաշինյանը վերահաստատեց, այն է, որ Հայաստանում չկա փոփոխությունների սահմանադրական երաշխավորված նորմալ ու սահուն մեխանիզմ, միշտ կիսամեխանիզմներով է լինելու։

Այդ մարդն ասում է՝ «ես անում եմ այն, ինչ ուզում եմ, այն ամենը, ինչը իմ ծրագրում գրված չի եղել, անում եմ գաղտնի, իմ ստորագրած թղթերը ցույց չեմ տալու, թույլ էլ չեմ տա, որ կարդաք, եթե չեք ուզում՝ հեղափոխություն արեք»։

Այս ամենը նշանակում է, որ այս երկրում դատարաններ չկան, որովհետև այդ դեպքում Փաշինյանը կասեր՝ «համաձայն չեք, դատի տվեք»։ Չկա նաև ԱԺ, որովհետև կասեր՝ «եթե համաձայն չեք, իմպիչմենտ իրականացրեք»։ Ըստ նրա, այս երկրում կա մեկ մեխանիզմ, որ «գնաս, մարդկանց հավաքես, շատով գաս ու պարտադրես փոփոխություն»։ Սա երկրորդ հայտարարությունն է, որը մենք երկար ժամանակ ասում, պնդում էինք, ու մարդիկ չէին ուզում ընդունել»,- հավելեց Միքայել Նահապետյանը։

Նրա դիտարկմամբ՝ այս հայտարարություններից հետո արդեն լավ է, որ կա երկկողմանի կոնսենսուս, հիմա գուցե մարդիկ արդեն հավատան։

Միքայել Նահապետյանն անշնորհակալ գործ է համարում՝ ասելու, թե ինչ է սպասվելու երկրին Նիկոլ Փաշինյանի միանձնյա կառավարման արդյունքում։

«Ոչ մի լավ բան պետք չէ սպասել, այդ մարդու քաղաքական ֆանտազիաները կանխատեսելն անշնորհակալ գործ է։ Նիկոլ Փաշինյանն այն մարդը չէ, ում ֆանտազիաների հորիզոնները կարելի է կանխատեսել»,- շեշտեց մեր զրուցակիցը։

Նա նաև կոչ արեց Կառավարությունում աշխատող պաշտոնյաներին ազատման դիմում չգրել, դա որևէ բանի չի օգնելու։

«Այո, հնարավոր է՝ մենք ողջունենք այդ մարդկանց, ասենք՝ պարզվում է՝ նրանք համաձայն չեն Փաշինյանի հետ։ Եթե Կառավարությունում կան մարդիկ, որոնք համաձայն չեն Փաշինյանի հետ, կարող են մնալ և լինել քաղաքական դիվերսանտ Նիկոլ Փաշինյանի քաղաքական համակարգում»,- ընդգծեց Միքայել Նահապետյանը։