«Միայն Երևանի դպրոցներում դասերը 08։15 կսկսվեն, մարզերի դպրոցները դասերը կսկսեն ժամը 09։00-ին»․ Ժաննա Անդրեասյան
2025 թվականի սեպտեմբերի 1-ից Երևանի բոլոր հանրակրթական դպրոցներում դասերը կմեկնարկեն ժամը 08:15-ին։ Այս մասին երեկ հայտնել էր Երևանի քաղաքապետարանի խոսնակ Հայկ Կոստանյանը։
«Նախաձեռնության նպատակներից է այն, որ երեխաները խցանումների պատճառով դասերից չուշանան, ինչպես նաև երթևեկությունը որոշակիորեն թեթևանա առավոտյան ժամերին»,- նշել էր Կոստանյանը։
ՀՀ ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի այսօր կայացած նիստի ընթացքում ՀՀ ԿԳՄՍ նախարար Ժաննա Անդրեասյանը պարզաբանեց, որ խոսքը բացառապես վերաբերում է Երևանի դպրոցներին:
«Ուշադիր քաղաքացիները կնկատեն, որ հաղորդագրությունն առաջինը տարածել է Երևանի քաղաքապետարանը»,- ասաց նախարարը:
«Չեմ կարծում՝ սա որևէ մեծ ու էական փոփոխություն է կրթական գործընթացի համար, բայց կարող է մեծ փոփոխություն բերել տրանսպորտային հոսքերի՝ ավելի արդյունավետ կառավարման համար և թույլ կտա խցանումների մեջ չընկնել դպրոց գնացող մեր երեխաներին»,- հավելեց նա, ևս մեկ անգամ շեշտելով, որ երկուշաբթի օրվանից Երևանի դպրոցներում առաջին հերթի դասերը կսկսվեն ժամը 8։15:
Ժաննա Անդրեասյանն ասաց, որ մարզերի դպրոցները մինչև այս էլ աշխատում էին այլ ռեժիմով, քան Երևանի դպրոցները․ «Եթե Երևանի դպրոցների դասերը ժամը 08։30 էին սկսվում, մարզերում աշխատում են՝ սկսած ժամը 09։00-ից։ Եվ դա բոլորովին պատահական չէ, քանի որ դեռևս տարիներ առաջ Երևանում տարբեր կրթական մակարդակի հաստատությունների համար տարբեր սկիզբ է սահմանվել՝ նպատակ ունենալով կառավարել տրանսպորտային հոսքերը։ Բուհերում դասերը հիմնականում 09։30 են սկսվում, որ նաև մարդիկ միաժամանակ տնից դուրս չգան և ունենան հնարավորություն ավելի հարմարավետ պայմաններում հասնել իրենց ուսումնական հաստատություն և աշխատավայր։ Բուհերն ավելի ուշ են սկսում կրթական գործընթացը, քանի որ բուհերում ունենք մարզերից երթևեկող ուսանողներ, որ լրացուցիչ անհարմարություններ չառաջացնենք այդ ուսանողների համար»։
Մինչ այժմ դպրոցներում առաջին դասաժամը սկսում էր ժամը 08:30-ին։ Դասապրոցեսը 15 րոպեով շուտ սկսելու՝ Երևանի քաղաքապետարանի որոշումն արդեն արժանացել է հանրության բացասական արձագանքին, պակաս չեն նաև մասնագիտական մտահոգությունները։ Կրթության փորձագետ Սերոբ Խաչատրյանը Tert.am- հետ զրույցում նշել է, որ այդ փոփոխությունը կարող է բացասաբար անդրադառնալ երեխաների և՛, առողջության, և՛ առաջադիմության, նույնիսկ տրամադրության վրա։
«Դե հիմա մենք պետք է մտածենք՝ մեզ համար ի՞նչն է առաջնային՝ խցանումները, թե՞ երեխաների առողջությունը։ Եվ այն դեպքում, որ այդ երեխաների մեծ մասը ոչ էլ երթևեկում է։ Հայաստանի երեխաների մեծ մասը գնում է բակի դպրոց։ Այսինքն, երեխաները մեծ մասամբ չեն նպաստում խցանմանը, բայց ստացվում է, որ իրենք պիտի վճարեն դրա գինը»,- նշել է Խաչատրյանը։
