Երեխաները մեծ մասամբ չեն նպաստում խցանման առաջացմանը, բայց ստացվում է, որ իրենք պիտի վճարեն դրա գինը. փորձագետը՝ դասերը 08:15-ին սկսելու որոշման մասին
025 թվականի սեպտեմբերի 1-ից Երևանի բոլոր հանրակրթական դպրոցներում դասերը կմեկնարկեն ժամը 08:15-ին։ Այս մասին երեկ հայտնել էր Երևանի քաղաքապետարանի խոսնակ Հայկ Կոստանյանը։
«Նախաձեռնության նպատակներից է այն, որ երեխաները խցանումների պատճառով դասերից չուշանան, ինչպես նաև երթևեկությունը որոշակիորեն թեթևանա առավոտյան ժամերին», – նշել էր Կոստանյանը։
Մինչ այժմ դպրոցներում առաջին դասաժամը սկսում էր ժամը 08:30-ին։ Դասապրոցեսը 15 րոպեով շուտ սկսելու՝ Երևանի քաղաքապետարանի որոշումն արդեն արժանացել է հանրության բացասական արձագանքին, պակաս չեն նաև մասնագիտական մտահոգությունները։ Կրթության փորձագետ Սերոբ Խաչատրյանը Tert.am- հետ զրույցում նշում է, որ այդ փոփոխությունը կարող է բացասաբար անդրադառնալ երեխաների և՛, առողջության, և՛ առաջադիմության, նույնիսկ տրամադրության վրա։
«Մանկաբույժների, հոգեբանների հետազոտությունները ցույց են տալիս, որ երեխաների կենսաբանական ժամացույցն ավելի հետ է, դրա համար երեխաների ճնշող մեծամասնությունը չի կարողանում առավոտյան արթնանալ: Այդ արթնացման պրոցեսն էլ միանգամից չի լինում: Մարդը, որ վեր է կենում անկողնուց, դա դեռ չի նշանակում, որ ինքն արթուն է: Ուղեղն ակտիվանում է մոտավորապես մեկ ժամվա ընթացքում: Հիմա մենք ի՞նչ պիտի ունենանք. երեխան պետք է մի կերպ, հազիվ հասնի, նստի դասի ու ուղեղը դեռ պետք է քնած վիճակում լինի», – որոշմանն արձագանքում է Սերոբ Խաչատրյանը:
Փորձագետն առաջ է բերում նաև միջազգային օրինակներ, ասում, որ շատ երկրներում նույնիսկ սկսել են դասապրոցեսն ավելի ուշ սկսել, Երևանում՝ հակառակը: Նա մտահոգություն է հայտնում նաև փոփոխության պատճառաբանության վերաբերյալ։
«Դե հիմա մենք պետք է մտածենք՝ մեզ համար ի՞նչն է առաջնային՝ խցանումները, թե՞ երեխաների առողջությունը։ Եվ այն դեպքում, որ այդ երեխաների մեծ մասը ոչ էլ երթևեկում է։ Հայաստանի երեխաների մեծ մասը գնում է բակի դպրոց։ Այսինքն, երեխաները մեծ մասամբ չեն նպաստում խցանմանը, բայց ստացվում է, որ իրենք պիտի վճարեն դրա գինը», – նշում է Խաչատրյանը։
Նա նաև մատնանշում է երեխաների անվտանգության խնդիրը, օրինակ ձմռանը, երբ առավոտյան դեռ մութ է, թափառող շներն էլ այդ ժամերին գուցե ավելի ագրեսիվ լինեն:
Այս ամենին զուգահեռ, սակայն, Կրթության փորձագետը փորձում է դրական կետեր փնտրել, ասում է՝ հնարավոր է, որ օրակարգի շուտ սկսվելու պարագայում արտադպրոցական խմբակներին երեխաները կարողանան ավելի շատ ժամանակ հատկացնել, սակայն 15 րոպեի տարբերությունը դրական, նշանակալի առաջընթացի դժվար թե հանգեցնի։
