«Պաչկով» կալանքներ, ծանր հիվանդ մարդուն կալանավորել միջնորդող դատախազ, ուրիշի փոխարեն «նստած» մեղադրյալ. քաղաքական ֆարսի հերթական օրը
Այսօր Երևան քաղաքի ընդհանուր իրավասության քրեական դատարանի Կենտրոն նստավայրում՝ դատավոր Կարեն Ֆարխոյանի նախագահությամբ, տեղի ունեցավ Բագրատ սրբազանի և ևս 18 հոգու մասնակցությամբ, այսպես կոչված, «ահաբեկչության» գործով դատական նիստը:
Այս գործով, բացի Բագրատ սրբազանից, կալանավորված են նաև Տավուշի թեմը ներկայացնող Լիդյա Մանթաշյանը, արցախցի պատգամավոր Դավիթ Գալստյանը, 44-օրյա պատերազմի նահատակ Հակոբ Ռոստոմյանի հայրը՝ Արա Ռոստոմյանը, Ազգային ժողովի (ԱԺ) «Հայաստան» խմբակցության պատգամավոր Արթուր Սարգսյանը, Վահագն Չախալյանը, գնդապետ Մախսուդյանը, այլ անձինք:
Բագրատ սրբազանն ու գործով անցնող մյուսները մեղադրվում են ահաբեկչության, զանգվածային անկարգությունների կազմակերպման և իշխանության բռնազավթման մեջ։
Նախորդ դատական նիստի սկզբում պարզ դարձավ, որ պաշտպանների մեծ մասը չի ներկայացել դատական նիստին: Բոյկոտել էին նիստը: Առանց պաշտպանների մասնակցության, սակայն, 3 ամսով երկարաձգվեցին Բագրատ սրբազանի, Արման Իսրայելյանի, Արթուր Սարգսյանի, Վահագն Չախալյանի, Արսեն Ղազարյանի կալանքի ժամկետները: Զոհված զինծառայող Հակոբ Ռոստոմյանի հոր՝ Արա Ռոստոմյանի բանտային կալանքը փոխարինվեց եռամսյա տնային կալանքով: Նրան նաև թույլ տրվեց շաբաթը 2 անգամ հսկիչների ուղեկցությամբ այցելել Եռաբլուր զինվորական պանթեոն՝ որդու շիրմին:
Այսօրվա դատական նիստի մեկնարկին Բագրատ արքեպիսկոպոս Գալստանյանը պահանջեց, որպեսզի դատարանն իրեն այլևս չդիմի ավազանի անունով, ապա շարունակվեց «18 արդարների գործով» մյուս մեղադրյալների խափանման միջոցների հարցի քննությունը:
Նախ քննվեց Տիգրան Գալստյանի խափանման միջոցի հարցը:
«41 տարեկան եմ, 4 անչափահաս երեխաների հայր: Երբեք որևէ քրեական գործով չեմ անցել: Իմ չորս անչափահաս երեխաների դաստիարակությունից ես զրկված եմ միայն այն պատճառով, որ քննությունն օբյեկտիվ չի անցկացվում»,- ասաց Տիգրան Գալստյանը՝ հավելելով, որ հայտնաբերված ծխերն ազատ վաճառքի են, և ցանկության դեպքում մեղադրող կողմն ինքը կարող է այն ձեռք բերել:
Տիգրան Գալստյանի կալանքի ժամկետը երկարաձգվեց 3 ամսով:
Հաջորդը Կարո Օկոմուշյանի հերթն էր: Վերջինս պատգամավոր Արթուր Սարգսյանի վարորդն է, և նրա պաշտպանն ասաց՝ իր պաշտպանյալի մեղքը միայն այն է, որ նա Արթուր Սարգսյանի վարորդն է:
Պաշտպանը միջնորդեց կիրառել համակցված խափանման միջոց՝ 1.5 միլիոն դրամ գրավ և տնային կալանք:
«Իմ վարորդն է Կարոն, հայրենասեր ու արժանապատիվ մարդ, բայց քաղաքականությունից հեռու: Իր աշխատանքի բերումով որտեղ ես եմ եղել, եղել է նաև ինքը: Եթե ինքը եղել է այդ տանը, Բագրատ սրբազանն իմ եղբայրն է, նրա տանն իմ կինն ու երեխաներն էլ են եղել, դե նրանց էլ կալանավորեք»,- ասաց Արթուր Սարգսյանը:
Կարեն Օկոմուշյանի կալանքի ժամկետը ևս երկարաձգվեց 3 ամսով և հայտարարվեց ընդմիջում 10 րոպեով:
Հաջորդիվ քննվեց Տիգրան Թոփալյանի կալանքի ժամկետի երկարաձգման հարցը: Վերջինիս կալանքը նույնպես երկարաձգվեց 3 ամսով:
Ապա հասավ Մովսես Շարբաթյանի հերթը:
«Իմ երեխաներն ի՞նչ կապ ունեն, որ ես զրկված եմ նրանց հետ շփվելուց: Ես այս պայքարի ընթացքում ընկերներ եմ ձեռք բերել, դուք՝ կոլեգաներ: Իմ կալանքի ընթացքում իմ ընկերները կգան-կգնան մեր տուն: Իսկ իմ որդին, ով 3 ամսական է, հպարտությամբ կրում է Բագրատ անունը՝ ի պատիվ Բագրատ սրբազանի»,- ասաց Շարբաթյանը:
Նա ևս կալանավորվեց 3 ամսով:
Մյուս «դատվողը» ՀՅԴ-ական Իգոր Սարգսյանն էր: Նրա պաշտպան Մկրտիչ Դավթյանի ելույթի ժամանակ լարվածություն առաջացավ դատական նիստերի դահլիճում, երբ վերջինս ասաց՝ «Այս գործը հրահանգված է: Ես տեսնում եմ 4 հանրային մեղադրողի՝ երեքը՝ դիմացս նստած, մեկը դատական ակտ է կայացնում: Ես՝ որպես անաչառ դատավորի մասնակցություն, չեմ տեսնում այս նիստում»:
Կարեն Ֆարխոյանը հրահանգեց նստել, սակայն պաշտպանը շարունակեց խոսել:
Ֆարխոյանը ևս մեկ անգամ բորբոքվեց, երբ պաշտպանն ասաց՝ ով է քաղաքական գործերով հրահանգ տվողը:
«Աթոռի համար կռիվ մի՛ արեք, հայրենիքի համար կռիվ արեք, որ աթոռ դնելու տեղ ունենաք»,- վերջում Վազգեն Սարգսյանի խոսքերը հիշեցրեց պաշտպան Դավթյանը:
Խոսեց նաև Իգոր Սարգսյանը:
«Պատվարժա՛ն դատարան, անկախ նրանից՝ ինչ որոշում կկայացնեք, ինձ մոտ ոչինչ չի փոխվելու: Ես շարունակելու եմ պայքարել իմ ազգի արժանապատիվ ապրելու իրավունքի համար: Ես ապրել եմ 56 տարի և ամբողջ կյանքիս ընթացքում հավատարիմ եմ եղել հայի կոչմանը: Ես պատիվ եմ ունեցել ճանաչել ու լինել Լեոնիդ Ազգալդյանի, Դուշման Վարդանի, Թաթուլ Կրպեյանի, Հակոբ Ռոստոմյանի, Մոնթեի զինակից ընկերը: Պատիվ ունեմ լինել աստվածապաշտ, ոչ ուրացող, հայրենապաշտ, ոչ դավաճան, ազգասեր, ոչ կեղծավոր ու բանսարկու, արդարամիտ, ոչ կեղծ խաղաղության ստերով սեփական ժողովրդիս կերակրող: Ես ՀՅԴ-ական եմ, ինձ չեք վախեցնի ո՛չ բանտերով, ո՛չ աքսորներով, ո՛չ մահերով: Հզոր տղերք են պայքարի մեջ մոխրացել, բայց նորից հառնել են և կյանք պարգևել իրենց սերունդներին: Մենք էլ մեր սերունդներին կփոխանցենք: Մտածելու բան մենք չունենք, դուք ունեք: Կդատեք պատվերով, մի օր պատվերով ձեզ էլ կդատեն: Եվ վերջում. ուրացող, բանսարկու իշխանությունը մոտեցել է իր ավարտին: Գալիս է պատասխան տալու և հատուցման ժամանակը: Մեղադրողնե՛ր, կա՛նգ առեք, կեղծ խաղաղություն քարոզելով՝ մեզ դժոխքի միջանցքով տանում են դեպի Դեր Զորի անապատ»,- ասաց նա՝ դիմելով դատավորին:
Իգոր Սարգսյանի կալանքը երկարաձգվեց 3 ամսով:
Հայտարարվեց 15 րոպե ընդմիջում, ինչից հետո քննության առնվեց Արցախի Հանրապետության Ազգային ժողովի պատգամավոր Դավիթ Գալստյանի խափանման միջոցի հարցը:
«Ես մասնակցել եմ շատ հանրահավաքների, բայց երբեք բերման անգամ չեմ ենթարկվել: Իմ տանը վերջին 3 տարիներին անգամ տոնածառ չի զարդարվում, որովհետև իմ երեխաների քեռին անհետ կորած է: Իմ գնած վերջին «պայթուցիկը» կրակայրիչն է»,- ասաց Դավիթ Գալստյանը:
Խոսեց նաև պաշտպան Հովհաննես Խուդոյանը:
«Պատվարժան դատարան, այս գործի պատվիրատուներն էս մարդուց հայրենիք են խլել, հիմա էլ ուզում են Ձեր ձեռքով ազատությունը խլել: Սա վաղուց արդեն իրավական քննարկումների հարց չէ, պարզ ընտրության հարց է: Դուք ուզում եք Ձեզ տեսնել այդ մարդկանց շարքո՞ւմ, թե՞ ոչ»,- դատավորին դիմելով՝ ասաց Հովհաննես Խուդոյանը:
Դավիթ Գալստյանի կալանքը նույնպես երկարաձգվեց 3 ամսով: Հայտարարվեց 20 րոպե ընդմիջում:
Ընդմիջումից հետո դատարանը քննեց գնդապետ Միհրան Մախսուդյանի կալանքի երկարաձգման հարցը:
«Ո՞ւր է էդ ապացույցը, բա գոնե մի փաստ բերեիք: Մենք գործ ունենք մի մարդու հետ, ով 12 տարեկանից գտնվում է հայրենիքի պաշտպանության գծում, մասնակցել է բոլոր պատերազմներին, կորցրել է հորը, եղբորը, հորեղբորը: Մահվան աչքերին ուղիղ նայած մարդը չի կարող կատարել հանցավոր արարք, որը կլինի իր ժողովրդի դեմ: Հակաիշխանական դիրքորոշում ունենալը չի նշանակում, որ մարդը հանցագործ է: Ես էլ ունեմ հակաիշխանական արարքներ: Դե ինձ էլ բռնեք: Գործը ու մեղադրական եզրակացությունը ծայրից ծայր կարդացել եմ: Գործող 32 վկաներից ոչ մեկը Միհրան Մախսուդյանի անունը չի տալիս: Եթե չի տալիս, էդ ո՞նց պիտի նա ազդի վկաների վրա, որ ի՞նչ ասի… Գրեթե 40 տարվա ստաժ ունեմ, սենց մեղադրական եզրակացություն չէի տեսել: Չգիտեի՝ լա՞մ, թե՞ խնդամ»,- ասաց նրա պաշտպան Աննա Մանթաշյանը:
Մախսուդյանը նշեց՝ ծառայել ու շարունակելու է ծառայել իր ժողովրդին, հայրենիքին ու պետականությանը:
«Ես գնդապետ եմ, կոչումս ստացել եմ խրամատում, իմ քրտինքով: Որոշ գնդապետների պես աթոռի տակ պախկված չեմ եղել պատերազմի ժամանակ, պատերազմից հետո էլ աթոռի վրա չեմ նստել»,- ասաց Միհրան Մախսուդյանը:
Միհրան Մախսուդյանի կալանքը ևս երկարաձգվեց 3 ամսով:
Կրկին հայտարարվեց ընդմիջում, որից հետո քննվեց արդեն իսկ խափանման միջոցը փոխված Աղվան Արշակյանի խափանման միջոցի փոփոխության հարցը: Հանրային մեղադրողը միջնորդեց փոխել նրա տնային կալանք խափանման միջոցն ու կիրառել կալանք:
Հանրային մեղադրող, փոխգնդապետ Հայկ Հովհաննիսյանը «Սրբազան պայքարի» գործով կալանավորված, ապա առողջական ծանրագույն խնդիրների սրման հիմքով բանտային կալանքից ազատված, այժմ տնային կալանքի ռեժիմում գտնվող, երբևէ չդատված, չարատավորված 28-ամյա Աղվան Արշակյանին միջնորդեց կրկին կալանավորել: Աղվան Արշակյանը տառապում է գլխուղեղի քաղցկեղով, կալանավայրում ուշագնաց է եղել, նրա առողջական խնդիրներն արձանագրել է ՄԻՊ–ը, բայց դա չխանգարեց Հայկ Հովհաննիսյանին կրկին միջնորդել կալանավորել Աղվան Արշակյանին: Բարեբախտաբար, Կարեն Ֆարխոյանը մերժեց միջնորդությունը՝ ևս 3 ամիս ժամկետով անփոփոխ թողնելով տնային կալանք խափանման միջոցը:
Պաշտպանն առարկեց՝ խոսքեր չունեմ, արդեն կալանքից ազատված մարդը կարող է կալանավորվել միայն նոր հանցանք կատարելու կամ ի հայտ եկած նոր հանգամանքների պարագայում:
«Պետությունն արդեն մի անգամ դիմել է առողջական ծանր խնդիրներ ունեցող Աղվան Արշակյանին կալանավորելու արկածախնդրությանը: Նա հազիվ է փրկվել: Նման պայմաններում կրկին խոսել կալանքի՞ց… Ես խոսքեր չունեմ: Մենք խոսում ենք իրավաբանությունի՞ց, թե՞ դահիճ լինելուց: Պատվարժան դատարան, խնդրում եմ հաշվի առեք, դուք որոշում եք 28-ամյա, որևէ դրվագով չարատավորված երիտասարդի ճակատագիրը, ում ծանրագույն առողջական վիճակի վերահսկումը հնարավոր չէ իրականացնել բանտային պայմաններում: Աղվան Արշակյանը գլխուղեղի ագրեսիվ տեսակի քաղցկեղով է տառապել: Բազմաթիվ բժիշկներ Եվրոպայում, Ռուսաստանում ու այստեղ հանձն չեն առել վիրահատել: Նա փրկվել է, որովհետև, ի վերջո, մի բժիշկ հանձն է առել վիրահատել նրան: Նա կալանավայրում արդեն իսկ ուշաթափվել է: Էլ ի՞նչ է պետք, որ կալանքի որոշումն արկածախնդրություն համարվի: Դա ոչ այլ ինչ է, քան խոշտանգում»,- ասաց նրա պաշտպանը:
Աղվան Արշակյանն էլ ասաց՝ գործից չի խոսի, իր միակ խնդիրն իր առողջական վիճակն է:
«Կալանքի ժամանակ փաստագրված է՝ ոնց է վատթարացել իմ առողջական վիճակը: Չգիտեմ: Ես ոչ մի բանի չեմ խոչընդոտի, պատճառ էլ չունեմ: Հույս ունեմ՝ արդար դատաքննությունն ամեն ինչ իր տեղը կդնի»,- ասաց Աղվան Արշակյանը:
Դատարանը մերժեց միջնորդությունը. Աղվան Արշակյանը ևս 3 ամիս կմնա տնային կալանքի ռեժիմում:
Նորից հայտարարվեց ընդմիջում, ապա հերթը հասավ Արմեն Ալեքսանյանի խափանման միջոցի հարցի քննությանը:
«Արմեն Ալեքսանյանը ոչինչ չի ասել: Նրան վերաբերելի մեղադրանքը գզգզված չուչելն է ու սոխով ձվածեղը: Ինչով նա կալանավորվել է, հիմա մեղադրանքի ծավալում չկա: Գործում ուրիշ Արմենի ասածը վերագրել են իմ պաշտպանյալին: Եթե էդ Արմենի անունը Վիգեն լիներ, հիմա Արմեն Իսրայելյանը կալանավորված չէր լինի: Էս մարդն այստեղ նստած է ուրիշ անձի ասած բառերի համար, որն էլ դուրս են բերել մեղադրանքի ծավալից»,- ասաց նրա պաշտպանը:
Ձվածեղի տեսանյութի համար կալանավորված Արմեն Ալեքսանյանի կալանքի ժամկետը նույնպես երկարաձգվեց 3 ամսով:
Ժամը 21:00-ին մեկնարկեց վերջին մեղադրյալի՝ Հայկ Շահնազարյանի խափանման միջոցի երկարաձգման հարցը: Պաշտպանները նշեցին՝ իրենց պաշտպանյալն ունի առողջական խնդիրներ: Հայկ Շահնազարյանը միացավ իր պաշտպանների դիրքորոշմանը, ովքեր միջնորդեցին կիրառել համակցված խափանման միջոց՝ 50 միլիոն դրամ գրավ և տնային կալանք: Ներկայացվեցին նրա բժշկական փաստաթղթերը: Ասաց, որ մեղադրանքը չի ընդունում:
Հայկ Շահնազարյանի կալանքը ևս երկարաձգվեց 3 ամիս ժամկետով:
Դատական նիստն ավարտվեց: Հաջորդ նիստը կկայանա սեպտեմբերի 10-ին՝ ժամը 16:00-ին:
Հիշեցնենք, որ ըստ ՔԿ-ի՝ ««Սրբազան պայքար» անվանումը կրող շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքերի առթիվ նախաձեռնված քրեական վարույթի շրջանակներում ՀՀ քննչական կոմիտեի քննիչների կողմից ՀՀ ազգային անվտանգության ծառայության և ՀՀ ՆԳՆ ոստիկանության աշխատակիցների հետ համատեղ իրականացվել են ավելի քան 9 տասնյակ խուզարկություններ, որոնց արդյունքում հայտնաբերվել են նշված հանցագործություններին առնչվող, նախաքննությամբ ձեռք բերված տվյալները հաստատող առարկաներ և փաստաթղթեր, ինչպես նաև ապացուցողական նշանակություն ունեցող անհերքելի այլ փաստական տվյալներ, այդ թվում՝ հրազեն և ռազմամթերք, գործողությունների պլաններ, հավաքագրված անձանց ցուցակներ, մետաղական իրեր, ճայթրուկներ, ծխարձակող միջոցներ, զինվորական հանդերձանք, ռադիոկապի միջոցներ, անօդաչու թռչող սարքեր, թմրամիջոցին նմանվող բուսական զանգվածներ, բռնի կերպով իշխանությունը յուրացնելուց հետո գործադիր իշխանության համապատասխան պաշտոններում նշանակվող անձանց ցուցակ, հանցավոր խմբի կողմից իրականացվելիք ապօրինի գործողությունների մանրակրկիտ պլանավորման, դրանց հերթականության, ժամանակագրության վերաբերյալ փաստաթղթեր և այլն»:
Ինչպես հետո պիտի պարզվեր, անհերքելի ապացույցները հերքելի էին, և մասնավորապես հրապարակված ձայնագրությունները՝ մոնտաժված, ինչպես պնդում էին Բագրատ սրբազանն ու մեղադրյալների պաշտպանները:
Նախաքննության ավարտից հետո մասնավորապես Բագրատ սրբազանի պաշտպան Հովհաննես Խուդոյանը սկսեց հատվածաբար հրապարակել աղմկահարույց ձայնագրությունների չմոնտաժված տարբերակները, և Քննչական կոմիտեի ու դատախազության փչած փուչիկը պայթեց:
Մանրամասները՝ տեսանյութում:
