Եկել եմ պաշտպանելու Եկեղեցին, Քրիստոսի զավակներին, Սամվել Կարապետյանին. փաստաբան Ռոբերտ Ամստերդամ

Քիչ առաջ Հայաստան ժամանեց քաղաքական հարցերով առաջին կարգի միջազգային իրավաբան Ռոբերտ Ամստերդամը:

Նրա այցը պայմանավորված է Հայ Առաքելական Եկեղեցու, հայտնի բարերար, գործարար Սամվել Կարապետյանի դեմ հարձակումներով և վերջինիս ապօրինի կալանքով։

Հայտնի փաստաբանը օդանավակայանում պատասխանեց լրագրողների հարցերին.

-Հայաստանում իմ առաքելությունն է` պաշտպանել Եկեղեցին, եկեղեցու զավակներին, Քրիստոսի զավակներին, ովքեր ապօրինաբար զրկվել են ազատությունից: Երբ մարդիկ հավատացյալ են, սիրում են իրենց եկեղեցին և իրենց երկիրը, ինչպես Սամվել Կարապետյանը, սակայն նրանց բիզնեսներն ապօրինաբար հարձակումների, ռեյդի են ենթարկվում, ուրեմն ինչ-որ բան այն չէ: Անհրաժեշտություն կա Կառավարության և Եկեղեցու միջև երկխոսության: Ես հույս ունեմ, որ կսկսվի այդ երկխոսությունը, մեղադրանքները կկարճվեն և այդ գործընթացի արդյունքում Եկեղեցին կլինի պաշտպանված: Եկեղեցին Հայաստանում առանցքային նշանակություն ունի լեզվի, կրոնի համար և բոլոր մարդկանց համար, այն կարևոր նշանակություն ունի ոչ միայն հայ քրիստոնյաների, այլև ողջ աշխարհի բոլոր քրիստոնյաների համար: Հավատացյալ բոլոր մարդիկ պետք է պաշտպանեն Եկեղեցին Հայաստանում:

Հարցին, թե կա՞ արդյոք աշխարհում որևէ այլ պետություն, որը պայքարում է Եկեղեցու դեմ, նա պատասխանեց.

-Ես շատ հին փաստաբան եմ, ես պաշտպանում եմ Եկեղեցին Ուկրաինայում, ես պաշտպանել եմ Ուղղափառ եկեղեցին 45 տարի առաջ, և, դժբախտաբար, այսօր կա երկրների ցուցակ, որոնցում Եկեղեցին հարձակման ներքո է: Ըստ իս, չկա ավելի սրբազան պարտականություն, քան եկեղեցին պաշտպանելն է: Երբ տարիք ես առնում, Եկեղեցին և հավատքը տարիքիդ հետ շատ ավելի կարևոր են դառնում քո կյանքում: Դժբախտաբար, դրանց որպես պաշտամունքի վայրերի վերաբերվելու փոխարեն, իշխանավորները որոշ դեպքերում Եկեղեցին ծառայեցնում են քաղաքական նպատակների, արտաքին քաղաքական նպատակների: Ուստի, սա ինձ համար շատ կարևոր գործ է, շատ կարևոր առաքելություն: Ես հասկանում եմ խնդրի զգայունությունը Հայաստանում, և այն փաստը, որ Հայաստանն Ադրբեջանում ունի քրիստոնյա պատանդներ. ահա, թե ինչու եմ քայլ անում դեպի կառավարություն` երկխոսության և քննարկման համար:

Այո, ես ԱՄՆ-ում հայկական շրջանակների հետ ունեցել եմ որոշ հանդիպումներ, բայց Հայաստանում ևս հանդիպումների կարիք ունեմ, ջանք և զրույցներ են ինձ պետք, որպեսզի փորձենք սայլը տեղից շարժել և պաշտպանել Քրիստոսի զավակներին:

Լրագրողի հարցին, թե փաստաբանն ի՞նչ հույսեր ունի ՀՀ կառավարության հետ երկխոսությունից, մտավախություն չունի՞, որ ճնշումներ կլինեն իր դեմ, առավել ևս, որ խոսակցություններ կային, թե իր մուտքը կարգելեն Հայաստան, Ռոբերտ Անդերսենը պատասխանեց.

-Այսպես ասեմ` ես շատ սովոր եմ կառավարությունների կողմից գործադրվող ճնշման. Ռուսաստանում ինձ ձերբակալել են, յոթ երկրներում արգելել են իմ մուտքը, 50 տարի է, ինչ ես այս գործով եմ զբաղվում: Հասկանալի է, որ կարող են լինել ճնշումներ, բայց որպեսզի ճնշումը նպատակին հասնի, պետք է լինի մեկը, ով կճկվի: Իսկ մենք այդ ճնշումներից, կրոնը, իրավունքի գերակայությունը պաշտպանելիս չենք ճկվում:

Վաշինգտոնյան եռակողմ հանդիպանը և հայ գերիների հարցում ԱՄՆ նախագահ Դոնալդ Թրամփի կողմից հնարավոր աջակցությանն անդրադառնալով` միջազգային փաստաբանն ասաց.

-Դա շատ զգայուն թեմա է: Ես նույնիսկ դրա վերաբերյալ մեկնաբանություն չեմ անելու, քանի որ երբ մարդիկ պատանդառված են, պետք է թողնել, որ կառավարությունները բանակցեն, և ես նույնիսկ բառ չեմ ուզում այդ մասին ասել: Բոլորս պետք է աղոթենք նրանց ապահով վերադարձի համար:

Նշենք, որ Ամստերդամը հայտնի է տարբեր երկրներում մի շարք հասարակական-քաղաքական գործիչների և ակտիվիստների պաշտպանության գործերով։ Նա եղել է հայտնի ռուսաստանցի գործարար և ընդդիմադիր Միխայիլ Խոդորկովսկու փաստաբանը, որի համար էլ ձերբակալվել է Ռուսաստանում։ 2003 թվականին Ամստերդամը մասնակցել է Խոդորկովսկու՝ Ռուսաստանի ամենահարուստ մարդու, պաշտպանությանը, որին ներկայացնում էին որպես Ռուսաստանի նախագահ Վլադիմիր Պուտինի գլխավոր ընդդիմախոս։