15 տարվա քրեական պատմություն կուտակած տնօրենին Անահիտ Ավանեսյանը քաղաքական նպատակով օգտագործելու համար է պահում. Անուշ Պողոսյան
«Առողջապահության նախարարության՝ պետական բյուջեից հատկացված գումարների ծախսի արդյունավետության մասին խոսելիս նախ պետք է հասկանալ՝ արդյո՞ք բնակչության կյանքը փոխվել է դեպի լավը. եթե խնդրին այս դիտանկյունից ենք նայում, տեսնում ենք, որ ոչ թե փոխվել է, այլ՝ ընդհակառակը. առողջապահական համակարգում քաոս է, որից բողոքում են բոլորը»,- 168 TV-ի «Ռեվյու» հաղորդաշարի եթերում ասաց «Առողջության իրավունք» ՀԿ նախագահ Անուշ Պողոսյանը՝ անդրադառնալով Անահիտ Ավանեսյանի ղեկավարած գերատեսչության աշխատանքի որակին։
«Ի՞նչ է անում Առողջապահության նախարարությունը. բյուջեով հատկացված գումարների մեծ մասը ծախսում է կապիտալ շինարարության և բուժսարքավորումներ գնելու վրա։ Իհարկե, դա լավ բան է, բայց արդո՞ք արդարացված է՝ որպես ծախս։ Օրինակ, արդարացվա՞ծ է որևէ տարածաշրջանում 5 տոմոգրաֆիական սարք դնելը՝ այն դեպքում, երբ մարզերի բնակիչներն այդ սարքավորումից չեն օգտվում, նրանք գալիս են Երևան, որտեղ պահանջում են ներկայացնել միայն Երևանում անցած հետազոտության արդյունքները»,- ասաց Անուշ Պողոսյանը՝ Առողջապահության նախարար Անահիտ Ավանեսյանի՝ նախարարի գործառույթներից բխող գործունեությունը պայմանավորելով քաղաքական գործունեությամբ և ընտրություններին ընդառաջ քարոզարշավի անհրաժեշտությամբ։
«Ավանեսյանը փորձում է համակարգ բերել յուրայիններին. իրականացնում է տարբեր բժշկական կենտրոնների տնօրենների փոփոխություններ, նշանակում իր մարդկանց։ Այս ամենին նայեք քարոզարշավի տրամաբանությամբ։ Օրինակ, կան շատ վատ աշխատող տնօրեններ, որոնք այնքան շատ օրենքներ են խախտել, որ մի 15 տարվա քրեական պատմության հիմք կարող է դառնալ, բայց Անահիտ Ավնեսյանը շարունակում է թույլ տալ նրանց աշխատել տնօրենների պաշտոններում, ինչո՞ւ. որովհետև իրենց այդ մարդիկ պետք են ընտրությունների ժամանակ»,- շեշտեց Անուշ Պողոսյանը։
Հարցազրույցի մանրամասները՝ տեսանյութում։
