ՀՀ ՇՄ նախարարն ու ՄԱԿ-ի մշտական համակարգողը քննարկել են Հայաստանում անցկացվելիք COP17-ի կազմակերպչական հարցերը
Հայաստանի Հանրապետության շրջակա միջավայրի նախարար Համբարձում Մաթևոսյանն ընդունել է Հայաստանում ՄԱԿ-ի մշտական համակարգող Ֆրանսուազ Ժակոբին և մշտական համակարգողի գրասենյակի ղեկավար Դենիս Բեսեդիչին։
Հանդիպման մասին նախարարը գրել է «Ֆեյսբուք»-ի իր էջում՝ տեղեկացնելով, որ հանդիպման հիմնական առանցքում 2026 թվականին Հայաստանում կայանալիք Կենսաբազմազանության մասին կոնվենցիայի կողմերի 17-րդ համաժողովի՝ COP17-ի կազմակերպչական հարցերն էին։
«Հանդիպման ընթացքում քննարկեցինք համաժողովի կազմակերպման հիմնարար ուղղությունները՝ անցկացման վայրից և տեխնիկական պայմաններից մինչև այն, թե ինչպես ապահովել ակտիվ հանրային իրազեկում և ստեղծել ներառական միջավայր, որտեղ բոլոր շահակիցները կունենան մասնակցության հնարավորություն։
Պայմանավորվեցինք ակտիվացնել փոխգործակցությունը ինչպես կազմակերպչական, այնպես էլ բովանդակային ուղղությամբ՝ ապահովելով, որ COP17-ը դառնա իսկապես արդյունավետ հարթակ համաշխարհային բնապահպանական քաղաքականությունների ձևավորման և փորձի փոխանակման համար։
Վստահ եմ՝ մեր համատեղ աշխատանքը կնպաստի համաժողովի բարձր մակարդակով անցկացմանը և կթողնի երկարաժամկետ ազդեցություն գլոբալ բնապահպանական օրակարգի վրա»,- գրել է նա:
