Գերմանիայի կանցլերը Նեթանյահուին կոչ է արել «որքան հնարավոր է շուտ օգնություն ցուցաբերել Գազայի սովյալ բնակիչներին»
Գերմանիայի կանցլեր Ֆրիդրիխ Մերցը կիրակի օրը Իսրայելի վարչապետ Բենիամին Նեթանյահուի հետ հեռախոսազրույցի ժամանակ կոչ է արել նրան «որքան հնարավոր է շուտ օգնություն ցուցաբերել Գազայում սովյալ քաղաքացիական անձանց», հաղորդում է AFP-ն։
Մերցը «խորը մտահոգություն է հայտնել Գազայի աղետալի հումանիտար իրավիճակի կապակցությամբ», ասվում է Գերմանիայի կառավարության հայտարարության մեջ։
Հաղորդվում է, որ նա կոչ է արել Նեթանյահուին «անել հնարավոր ամեն ինչ՝ անհապաղ հրադադարի հասնելու համար»։
«Նա կոչ է արել նրան Գազայի սովյալ քաղաքացիական բնակչությանը տրամադրել շտապ անհրաժեշտ մարդասիրական օգնություն։ Այդ օգնությունը պետք է արագ, անվտանգ և անհրաժեշտ քանակությամբ հասցվի քաղաքացիական բնակչությանը», – նշվում է Գերմանիայի կառավարության հաղորդագրության մեջ։
Ավելի վաղ Իսրայելը, զանգվածային սովի պատճառ դառնալու համընդհանուր մեղադրանքների և Գազայի հատվածում թերսնումից մահվան տասնյակ դեպքերի մասին հաղորդումների ֆոնին, «մարդասիրական դադար» էր հայտարարել անկլավի երեք շրջանում։
