Իրանում հայտարարել են Օմանի ծոց ամերիկյան ականակրի մտնելու փորձը կանխելու մասին
Իրանի ռազմածովային ուժերի ուղղաթիռը հուլիսի 23-ին խստորեն նախազգուշացրել է Օմանի ծոցում գտնվող և իրանական տարածքային ջրերին մոտենալու փորձ կատարած ամերիկյան ականակրին՝ ստիպելով վերջինիս անձնակազմին փոխել ուղղությունը։ Այս մասին հայտնում է իրանական Tasnim լրատվական գործակալությունը։
Նշվում է, որ USS Fitzgerald (DDG-62) ականակիրը նկատվել է Իրանի տարածքային ջրերի ուղղությամբ շարժվելիս։ Դրան անմիջապես արձագանքել է Իրանի ռազմածովային ուժերի երրորդ ռազմածովային շրջանի օդային ստորաբաժանումը։ Իրանական ռազմական ուղղաթիռն անցնելով ամերիկյան նավի վրայով՝ դրա անձնակազմից պահանջել է փոխել երթուղին:
Իրանական ռազմական աղբյուրների հաղորդմամբ՝ ամերիկյան ականակիրը սպառնացել է կրակ բացել ուղղաթիռի ուղղությամբ, սակայն իրանցի օդաչուն կրկնել է հնչեցրած պահանջը:
Այն բանից հետո, երբ ամերիկյան ռազմանավը կրկնել է կրակելու սպառնալիքը, իրավիճակին միջամտել է Իրանի հակաօդային պաշտպանության հրամանատարությունը՝ հայտարարելով, որ ուղղաթիռը գտնվում է ՀՕՊ ստորաբաժանումների պաշտպանության ներքո, և ամերիկյան նավին հրամայել է շարժվել դեպի հարավ։ Ի վերջո, ամերիկյան ռազմանավը լքել է Իրանի ջրային տարածքը:
