2.4 մլրդ եվրո՝ Թուրքիա-Նախիջևան երկաթուղու համար
Թուրքիայի տրանսպորտի և ենթակառուցվածներքի նախարար Աբդուլքադիր Ուրալողլուն հայտարարել է, որ Թուրքիան և Նախիջևանը կապող երկաթուղային ծրագրի համար 2․4 միլիարդ եվրո արտաքին ֆինանսավորում է ներգրավել: Այն Կարս-Իգդիր-Արալըք-Դիլուջու երկաթուղային գծի հետ միասին Թուրքիայի արևելքը կկապի Ասիայի հետ: Այս մասին տեղեկացնում է ermenihaber.am-ը։
Նախարարը նշել է, որ ֆինանսավորումն ապահովվել է գանձապետարանի և ֆինանսների նախարարության աշխատանքների արդյունքում: Ուրալողլուն գնահատել է սա որպես Թուրքիայի իրականացրած տնտեսական ծրագրի նկատմամբ միջազգային վստահության դրսևորում:
Նախարարն ավելացրել է, որ իր ղեկավարած գերատեսչությունն առաջ է շարժվելու այս ու նմանատիպ այլ ծրագրերով՝ նպատակ ունենալով ուժեղացնել Թուրքիայի լոգիստիկ հնարավորությունները:
Ըստ Ուրալողլուի՝ այս ծրագիրը մաս է կազմում Թուրքիայի ավելի լայն ռազմավարության՝ ուղղված տարածաշրջանային կապերի ամրապնդմանը:
