Օտարերկրացիների վարորդական իրավունքի ստացման համար Վրաստանում սահմանվել են լրացուցիչ պահանջներ
Վրաստանում վարորդական իրավունքի քննություն հանձնելու համար օտարերկրյա քաղաքացիների կամ քաղաքացիություն չունեցող անձանց համար սահմանվել են լրացուցիչ պայմաններ։ Այս մասին գրում է aliq.ge-ն։
Մասնավորապես, օրենքում կատարված փոփոխությունների համաձայն, անձը տեսական և/կամ գործնական վարորդական քննություն կհանձնի, եթե ներկայացնի փաստաթուղթ կամ բնակության վայրի վկայական, որը հաստատում է երկրում օրինական բնակությունը առնվազն 185 օրացուցային օրվա ընթացքում՝ քննությունից առաջ անընդմեջ տասներկու ամսվա ընթացքում:
«Սպասարկման գործակալությունը ծառայություններ կմատուցի օտարերկրյա քաղաքացուն կամ քաղաքացիություն չունեցող վարորդի թեկնածուին, որը հաջողությամբ հանձնել է տեսական քննությունը համապատասխան կատեգորիայի/ենթակատեգորիայի տրանսպորտային միջոց վարելու իրավունքի համար մինչև այս հրամանի ուժի մեջ մտնելը՝ համաձայն այս հրամանի ուժի մեջ մտնելուց առաջ գործող կանոնների», — նշված է «Օրենսդիր տեղեկագրում» հրապարակված հրամանում։
Նշենք, որ այս պահանջը չի տարածվի Վրաստանում հավատարմագրված դիվանագիտական առաքելությունների աշխատակիցների վրա։
Հարկ է նշել, որ քննությանը մասնակցելու համար, այս պահանջներից բացի, Վրաստանի քաղաքացիները, նաև օտարերկրյա և քաղաքացիություն չունեցող անձինք պետք է ներկայացնեն հետևյալ տվյալները.
- Էլեկտրոնային կամ ֆիզիկական դիմում, որում նշված է այն տրանսպորտային միջոցի կատեգորիան կամ ենթակատեգորիան, որի համար դիմորդը ցանկանում է ստանալ վարելու իրավունք,
- Լուսանկար (լուսանկարը պետք է արվի քննական գրասենյակում՝ օգտագործելով հատուկ տեխնիկական միջոցներ),
- Անձնագիր,
- Բնակության վայրը նշող փաստաթուղթ,
- Ծառայությունների մատուցման համար օրենքով սահմանված վճարումը հաստատող փաստաթղթեր,
- Վարորդական ուսումնական հաստատությունում համապատասխան վերապատրաստման ավարտը հաստատող փաստաթուղթ (բացառությամբ օրենքով նախատեսված դեպքերի),
- Վարորդական իրավունք, եթե վարորդի թեկնածուն վարորդական քննություններին մասնակցելու համար դիմելուց առաջ արդեն իսկ ստացել է այլ կատեգորիայի և/կամ ենթակատեգորիայի տրանսպորտային միջոցներ վարելու իրավունք։ Այս ենթակետում նշված դեպքում, փաստաթղթերը ստանալուց հետո, ներկայացված վարորդական իրավունքը վերադարձվում է անձին, և դա կրկին ներկայացնելու պարտավորություն ծագում է միայն այն դեպքում, եթե ի հայտ են գալիս վարորդական նոր իրավունք տրամադրելու հիմքեր,
- Առողջության վկայական։
