ՆԱՏՕ-ն չի քննարկում դաշինքի չընդլայնման վերաբերյալ Ռուսաստանի պահանջը
ՆԱՏՕ-ի շրջանակներում չեն քննարկվում Ռուսաստանի պահանջը, որով Մոսկվան Դաշինքից գրավոր երաշխիքներ է պահանջել դեպի արևելք չընդլայնվելու հարցով։
Այս մասին «svoboda.org»-ին հայտնել են դաշինքի մի խումբ աշխատակիցներ և դիվանագետներ՝ անանունության պայմանով։
Աղբյուրների փոխանցմամբ՝ ՆԱՏՕ-ի ընդլայնումից հրաժարվելու հնարավորությունը պաշտոնապես օրակարգում չի եղել ո՛չ վերջին հանդիպման, ո՛չ էլ ավելի վաղ տեղի ունեցած հանդիպումների ժամանակ։
Մեկ այլ աղբյուր, մեկնաբանելով Ռուսաստանի՝ չընդլայնման մասին գրավոր պարտավորություն ստանալու հավանականությունը, նշել է, որ նման պահանջը դժվար իրագործելի է։
«Ազատ որոշելու իրավունքը՝ թե որ դաշինքին միանալ, ամրագրված է մի շարք միջազգային պայմանագրերով»,– ընդգծել է նա։
ՆԱՏՕ-ի չընդլայնման մասին պահանջը Ռուսաստանը պարբերաբար ներկայացրել է՝ հատկապես Ուկրաինայի հետ հարաբերությունների սրացման և եվրատլանտյան ինտեգրման գործընթացների ֆոնին։ Սակայն դաշինքը շարունակում է հավատարիմ մնալ իր բաց դռների քաղաքականությանը՝ ընդգծելով, որ յուրաքանչյուր պետություն ինքն է որոշում իր արտաքին քաղաքական ուղին։
