Վենսն ու ֆոն դեր Լայենը Հռոմում բանակցություններ են վարել մաքսատուրքերի հարցով
ԱՄՆ փոխնախագահ Ջեյ Դի Վենսը կիրակի օրը Հռոมում Եվրոպական հանձնաժողովի նախագահ Ուրսուլա ֆոն դեր Լայենի հետ հանդիպման ժամանակ հայտարարել է, որ Եվրոպան «կարևոր դաշնակից» է, չնայած առևտրային հարցերում եղած տարաձայնություններին, հաղորդում է AFP-ն։
Վենսը հույս է հայտնել, որ բանակցությունները, որոնք նման բարձր մակարդակով առաջինն են այն բանից հետո, երբ ԱՄՆ նախագահ Դոնալդ Թրամփն այս տարվա սկզբին սահմանեց իր խիստ մաքսատուրքերը, «կդառնան որոշակի երկարաժամկետ առևտրային բանակցությունների սկիզբ»։
Նրանք հանդիպել են Իտալիայի վարչապետ Ջորջիա Մելոնիի հետ նրա հռոմեական գրասենյակում այն բանից հետո, երբ երեքով այցելել են Վատիկանում Հռոմի պապ Լևոն XIV-ի պաշտոնակալության պատարագին։
Հանդիպման սկզբում Վենսն ասել է. «Ես բազմիցս ասել եմ, որ Եվրոպան համարում եմ Միացյալ Նահանգների կարևոր դաշնակից, Եվրոպայում առանձին երկրներ Միացյալ Նահանգների կարևոր դաշնակիցներ են։
Բայց, իհարկե, մենք ունենք որոշ տարաձայնություններ, ինչպես երբեմն լինում է ընկերների մոտ, այնպիսի հարցերում, ինչպիսին է առևտուրը, և մենք նաև ունենք բազմաթիվ համաձայնություններ և շատ բաներ, որոնց վրա կարող ենք միասին աշխատել, և ես անհամբեր սպասում եմ այս խոսակցությանը»։
«Կարծում եմ՝ մենք հիանալի զրույց կունենանք, և հուսով եմ՝ (սա) կդառնա որոշակի երկարաժամկետ առևտրային բանակցությունների և որոշակի երկարաժամկետ առևտրային առավելությունների սկիզբ ինչպես Եվրոպայի, այնպես էլ Միացյալ Նահանգների միջև», – հավելել է Վենսը։
Իր հերթին, ֆոն դեր Լայենը, որը նստած էր Մելոնիի մի կողմում, իսկ Վենսը՝ մյուս, ողջունել է ԱՄՆ-ի և Եվրոպական միության միջև «շատ առանձնահատուկ և սերտ հարաբերությունները»։
«Բոլորը գիտեն, որ սատանան մանրուքների մեջ է թաքնված, բայց մեզ միավորում է այն, որ, ի վերջո, մենք ուզում ենք միասին երկու կողմերի համար էլ շահավետ գործարք կնքել», – ասել է Եվրահանձնաժողովի ղեկավարը։
Իր հերթին Ջորջիա Մելոնին, որը ձգտում էր կապող օղակ դառնալ Վաշինգտոնի և Բրյուսելի միջև, հույս է հայտնել, որ բանակցությունները կարող են «նոր սկիզբ» դառնալ։
«Մենք գիտենք, թե որքան կարևոր են ԵՄ-ի և ԱՄՆ-ի միջև հարաբերությունները ուժեղ Արևմուտքի, մեր քաղաքակրթության, ինչպես նաև մեր տնտեսական հարաբերությունների համար», – ասել է նա։
Բանակցությունները, հավանաբար, վերաբերել են նաև Ուկրաինային, և դրանց ներկա է եղել ԱՄՆ պետքարտուղար Մարկո Ռուբիոն։
Ապրիլին Թրամփը հայտարարել էր ԵՄ-ից ներկրվող ապրանքների մեծ մասի վրա 20 տոկոսանոց մաքսատուրքերի սահմանման, ինչպես նաև տասնյակ այլ երկրների համար մաքսատուրքերի բարձրացման մասին, սակայն այդ ժամանակից ի վեր սառեցրել է այս միջոցի գործողությունը մինչև հուլիս։ ԱՄՆ նախագահը մայիսի 9-ին հայտարարել էր, որ հույս ունի հանդիպել «ֆանտաստիկ» ֆոն դեր Լայենի հետ՝ հայտարարելով, որ դաշինքը «շատ է ուզում գործարք կնքել» ԱՄՆ-ի հետ։
