Երևանի ավագանու անդամի կնոջը պատկանող մեքենան հրկիզելու կասկածով ձերբակալվել է մեկ անձ
Երևանի ավագանու անդամի կնոջը պատկանող մեքենան հրկիզելու անմիջական կասկածի հիմքով ձերբակալվել է մեկ անձ:
Այս մասին տեղեկացրել է ՀՀ ՆԳ նախարարության մամուլի քարտուղար Նարեկ Սարգսյանը:
«Մայիսի 6-ին ժամը 4։22-ին հաղորդում էր ստացվել, որ մայրաքաղաքի Մկրտիչ Սեդրակյան փողոցում Երևանի ավագանու անդամի կնոջը պատկանող մեքենա է այրվում։ Գույքի դիտավորյալ վնասման դեպքով կազմված փաստաթղթերը փոխանցվել էին Քննչական կոմիտե, որտեղ նախաձեռնվել էր քրեական վարույթ։
ՆԳՆ քրեական ոստիկանության ծառայողների անհետաձգելի, ծավալուն օպերատիվ-հետախուզական միջոցառումների շնորհիվ մայիսի 7-ին հանցանքը կատարելու անմիջական կասկածի հիմքով ձերբակալվել է մեկ անձ։ Նա ներկայացվել է նախաքննական մարմին։ Միջոցառումները շարունակվում են»,- «Ֆեյսբուք»-ի իր էջում գրել է ՆԳՆ մամուլի քարտուղարը:
Օրեր առաջ «Մայր Հայաստան» շարժման առաջնորդ Անդրանիկ Թևանյանը «Ֆեյսբուք»-ի իր էջում կատարած գրառման միջոցով տեղեկացրել է, որ հրկիզել են Երևանի ավագանու «Մայր Հայաստան» խմբակցության անդամ Գևորգ Ստեփանյանի ընտանիքին պատկանող ավտոմեքենան, որը կայանված էր նրա տան բակում։
