Պեկինը մինչև վերջ կպայքարի, եթե ԱՄՆ-ն շարունակի մաքսատուրքային պատերազմը. Չինաստանի ԱԳՆ

Պեկինը մտադիր է պայքարել մինչև հաղթական ավարտ, եթե Վաշինգտոնը որոշի շարունակել մաքսատուրքային պատերազմը։ Ինչպես տեղեկանում ենք ՏԱՍՍ գործակալությունից, այդ մասին հայտարարել է Չինաստանի արտգործնախարար Վան Ին ԲՐԻԿՍ-ի երկրների ընդլայնված նախարարական հանդիպման ժամանակ, որը տեղի է ունեցել Ռիո դե Ժանեյրոյում։

«Չինաստանի պատասխանն առևտրային պատերազմին հստակ է և վճռական. եթե դուք պնդում եք պայքարելու վրա, ապա մենք կպայքարենք մինչև վերջ, եթե դուք պատրաստ եք երկխոսության, ապա մենք պետք է միմյանց հարգենք որպես հավասարներ», – ասել է Վան Ին։ 

Նախարարը հավելել է, որ ԲՐԻԿՍ-ը պետք է շարունակի պահպանել միջազգային հարաբերությունների հիմնական նորմերը, պաշտպանել բազմակողմ առևտրային համակարգը և կառուցել գլոբալ կառավարման ավելի արդար համակարգ։ 

Վան Իի խոսքով՝ այն բանից հետո, երբ ԱՄՆ-ն սկսեց «մաքսատուրքային մահակը թափահարել ամբողջ աշխարհում», միջազգային հանրությունը պետք է որոշի, թե արդյոք պատրաստ է «վերադառնալ ջունգլիներ, որտեղ ուժեղն ուտում է թույլին»։

Իր հերթին ԱՄՆ նախագահ Դոնալդ Թրամփը Միչիգանի ​​նահանգի Ուորեն քաղաքում իր երկրորդ նախագահական ժամկետի առաջին 100 օրվան նվիրված հանրահավաքում ելույթի ժամանակ հայտարարել է, որ Վաշինգտոնը ցանկանում է առևտրային համաձայնագիր կնքել Պեկինի հետ, բայց պայմանով, որ ԱՄՆ-ն դրա պատճառով տարեկան 1 տրիլիոն դոլար չկորցնի։

«Նրանք ուզում են համաձայնագիր կնքել։ Մենք մտադիր ենք համաձայնագիր կնքել, բայց դա արդար համաձայնագիր է լինելու։ Այս համաձայնագրի պատճառով մենք տարեկան մեկ տրիլիոն դոլար չենք կորցնելու, ինչպես դա եղավ (ԱՄՆ նախկին նախագահ Ջո) Բայդենի օրոք», – ասել է նա։

Ապրիլի 2-ին Թրամփը հայտարարեց 185 երկրներից և տարածքներից ներմուծվող ապրանքների նկատմամբ մաքսատուրքեր սահմանելու մասին։ Ապրիլի 5-ին ուժի մեջ մտան 10%-ի չափով բազային մաքսատուրքերը, իսկ ապրիլի 9-ին՝ անհատական ​​մաքսատուրքերը։

Միևնույն ժամանակ ԱՄՆ ղեկավարը հայտարարեց, որ 90 օրով կասեցնում է մի քանի երկրների և տարածքների նկատմամբ փոխադարձ սկզբունքով սահմանված լրացուցիչ ներմուծման մաքսատուրքերի գործողությունը, մինչ ընթանում են բանակցություններ։ Սակայն Չինաստանի նկատմամբ սահմանված 145% մաքսատուրքերն ուժի մեջ են մնացել։ Չինաստանն, ի պատասխան, ԱՄՆ-ի նկատմամբ սահմանել է 125% մաքսատուրքեր։