Հարավային Ամերիկայում տարեսկզբից ի վեր դեղին տենդից 74 մարդ է մահացել. ՄԱԿ
Լատինական Ամերիկայում դեղին տենդով հիվանդացության բռնկում է արձանագրվել. տարեսկզբից ի վեր Բոլիվիայում, Բրազիլիայում, Կոլումբիայում և Պերուում, ընդհանուր առմամբ, հիվանդացել է 189 մարդ, նրանցից 74-ը մահացել է։ Այս մասին հայտնել է Համաամերիկյան առողջապահական կազմակերպությունը:
«Ամերիկյան տարածաշրջանի չորս երկրում գրանցվել է մարդկանց շրջանում դեղին տենդի 189 հաստատված դեպք, որոնցից 74-ը՝ մահացու ելքով», – նշել է կազմակերպությունը՝ վկայակոչելով 2025 թվականի տվյալները։
Ընդ որում, ամենամեծ թվով դեպքերը՝ 102, գրանցվել են Բրազիլիայում, որոնցից 41-ը եղել են մահվան ելքով։ Կոլումբիայում հաստատվել է դեղին տենդի 53 դեպք, այդ թվում՝ 21 մահ, Պերուում՝ 32 դեպք, որոնցից 11-ը՝ մահվան ելքով։
Բոլիվիայում արձանագրված 2 դեպքերից մեկը եղել է մահվան ելքով։ Ապրիլի 17-ին Կոլումբիայի կառավարությունն արտակարգ դրության ռեժիմ է հայտարարել առողջապահության ոլորտում՝ դեղին տենդի բռնկման պատճառով։
Ինչպես նշել է առողջապահության նախարար Գիլիերմո Ալֆոնսո Խարամիլիոն, հիվանդությունը դուրս է եկել Ամազոնիայի սահմաններից՝ «դառնալով բացահայտ սպառնալիք երկրի և ամբողջ հասարակության համար»։
Դեղին տենդը սուր վիրուսային հիվանդություն է, որը փոխանցվում է վարակված մոծակների միջոցով։ Վարակման դեպքերի մոտ 90%-ը բաժին է ընկնում Աֆրիկայի՝ Սահարայից հարավ ընկած երկրներին։ Հիվանդությունը կարող է հանգեցնել ջերմության կտրուկ բարձրացման, լյարդի և երիկամների ախտահարման, բերանից և քթից արյունահոսության։
Բուժառուների կեսը, որոնց մոտ զարգանում է հիվանդության երկրորդ փուլը, մահանում է 7-10 օրվա ընթացքում:
