Կարծո՞ւմ եք` Նիկոլը չգիտի՞` ինչ է կատարվում. հերիք է, թողեք ապրենք, ի՞նչ եք ուզում. քասախցի
Քասախ գյուղի բնակիչները փակել են Աշտարակ-Երևան ավտոճանապարհը՝ պահանջելով լուծել համայնքի տրանսպորտի խնդիրը։ Բողոքի ակցիայի մասնակիցները հայտարարեցին, որ երկու տարի գործել է 59 համարի ավտոբուսը, սակայն այժմ որոշվել է դադարեցնել դրա աշխատանքը։ Փոխարենը, համայնքի բնակիչների խոսքով, փոխադրումները կրկին իրականացվելու են միկրոավտոբուսներով և ավելի թանկ ուղեվարձով։
«Կարծում եք` Նիկոլը չգիտի՞, որ թանկացնում են։ «Գազելի» մեջ մեկս մյուսին հեծած էինք գնում, իրար տհաճ հոտն էինք շնչում։ Հերիք ա, էլի, թողեք` ապրենք մեր հող ու ջրի վրա»,- նշեց ցուցարարներից մեկը։
Ակցիայի մասնակիցներից մեկն էլ նշեց, որ բարեփոխումները պետք է լինեն առաջադիմական, իսկ իրենց դեպքում հետընթաց է արվում՝ ավտոբուսից և՛ «Գազելին» վերադարձ, և՛ ուղեվարձի թանկացում։
«Մեր ճանապարհածախսը միշտ էլ 100 դրամ է եղել։ Ավտոբուսներով 150 դրամին համաձայն չէինք, հիմա «Գազելներով» կոխում են պրեսի մեջ, մյուսի շունչը քաշես, ու դարձնում են 200 դրամ»,- ասում է բողոքի ակցիայի մասնակիցներից մեկը։ Միաժամանակ երթուղին էլ կրճատվում է, ուսանողները բուհեր հասնելու համար 2-3 տրանսպորտ պիտի փոխեն։
Զգուշացնում են իշխանություններին՝ պայքարից չեն նահանջելու, քանի դեռ իրենց հարցին լուծում չի տրվել։ Անհրաժեշտության դեպքում նաև ավելի կոշտ միջոցների կդիմեն, այդ թվում` նստացույցեր կանցկացնեն ճանապարհին։
Նշենք, որ նախօրեին՝ ապրիլի 9-ին, Քասախ և Պռոշյան գյուղերի բնակիչները հանդիպել էին կառավարության ներկայացուցիչների հետ։
Ակցիայի մեկ այլ մասնակից պատմեց, որ Քասախն ու Պռոշյանը Երևանի հետ կապող թիվ 29 և 59 ավտոբուսները դեռ գործում են, սակայն նախօրեին կառավարությունում քասախցիների և պռոշյանցիների հանդիպման ժամանակ նրանց տեղեկացրել են, որ այդ երթուղիները շուտով կհանվեն։ Իսկ դա նշանակում է, որ երկու համայնքներն էլ կզրկվեն տրանսպորտից։
