
Մարտուն Գրիգորյանը ՀՀԿ-ի հետ առնչություն չունի. Տիգրան Աբրահամյան
Մարտուն Գրիգորյանը չի հանդիսացել և այժմ էլ չի հանդիսանում «Հանրապետական» կուսակցության անդամ, լրագրողների հետ հանդիպմանն այս մասին հայտարարեց ԱԺ «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով Գյումրիի և Մարտուն Գրիգորյանի շուրջ զարգացումներին։
«Մարտուն Գրիգորյանը «Պատիվ ունեմ» դաշինքում ընդգրկվել է «Հայրենիք» կուսակցության քվոտայով։ Որևէ ձևով չեմ նվազեցնելու Մարտուն Գրիգորյանի դերը կամ կեցվածքը որպես ընդգծված ընդդիմադիր գործիչ։ Սա ասում եմ, որպեսզի մեր հանրությանը ներկայացնեմ մեր հնարավոր ազդեցությունը կամ իր հետ որևէ ձևով խոսակցություն ունենալու լեգիտիմությունը»,-ասաց Տիգրան Աբրահամյանը։
Նա նշեց, թե «Հանրապետական» կուսակցությունը, հաշվի առնելով նշված գործոնները, իրեն իրավունք չի վերապահում ճնշում գործադրել կամ ուղղորդել իր խմբակցության անկուսակցական անդամի նկատմամբ։
«Մենք մեր գործընկերոջը հայտնել ենք մեր կարծիքը թեմայի հնարավոր հանգուցալուծման մասին, սակայն զերծ ենք մնում այն հանրայնացնելուց, որպեսզի դա չդիտվի որպես ճնշում կամ ազդեցություն Մարտուն Գրիգորյանի վրա»,- նշեց Աբրահամյանը։