Կանադայի նոր վարչապետն ապրիլին արտահերթ ընտրություններ է նշանակել
Կանադայի նոր վարչապետ, Լիբերալ կուսակցության առաջնորդ Մարկ Քառնին արտահերթ ընտրություններ է նշանակել ապրիլի 28-ին՝ հայտարարելով, որ իրեն ուժեղ մանդատ է պետք՝ հասցեագրելու ԱՄՆ նախագահ Դոնալդ Թրամփից եկող սպառնալիքը։ Այս մասին հաղորդում է Reuters գործակալությունը։
Մարտի 14-ին իր երդմնակալության ժամանակ Քառնին ասել էր, որ հարգում է Թրամփին և կարող է աշխատել նրա հետ։ Սակայն մարտի 23-ի իր ելույթը հակասում էր նախորդ հայտարարություններին։
«Մենք կանգնած ենք մեր կյանքի ամենակարևոր ճգնաժամի առջև՝ նախագահ Թրամփի չարդարացված առևտրային գործողությունների և մեր ինքնիշխանության նկատմամբ սպառնալիքների պատճառով։ Մեր պատասխանը պետք է լինի կառուցել ուժեղ տնտեսություն և ավելի անվտանգ Կանադա։ Նախագահ Թրամփը պնդում է, թե Կանադան իսկական երկիր չէ։ Նա ցանկանում է կոտրել մեզ, որպեսզի Ամերիկան տիրի մեզ։ Մենք թույլ չենք տա, որ նման բան տեղի ունենա», – ասել է Քառնին:
Կանադայի և ԱՄՆ-ի միջև հարաբերությունները բավական սրվել են այն բանից հետո, երբ Դոնալդ Թրամփը մաքսատուրքեր է սահմանել իր առևտրային վաղեմի գործընկերոջ նկատմամբ և սպառնացել է Կանադան դարձնել ԱՄՆ-ի 51-րդ նահանգը։
Ըստ հարցումների՝ Լիբերալ կուսակցությունը, որը Կանադայում իշխանության գլխին է կանգնած 2015 թվականից և տարվա սկզբին լրջորեն զիջում էր պաշտոնական ընդդիմություն հանդիսացող Պահպանողական կուսակցությանը, այժմ փոքր-ինչ առաջ է անցել իր մրցակիցներից։
Ըստ Angus Reid վիճակագրական ինստիտուտի տվյալների՝ լիբերալներն ունեն հանրության 42%-ի վստահությունը, իսկ պահպանողականները՝ 37%-ի։
