«Կովկասյան ռեգիոնի ճակատագրի առումով Հայաստանն ու Վրաստանը պետք է գործեն համատեղ»․ Հակոբ Բադալյան
Քաղաքական վերլուծաբան Հակոբ Բադալյանը տելեգրամի իր ալիքում գրել է․
«Հայաստան է այցելել Վրաստանի վարչապետ Իրակլի Կոբախիձեն: Հայաստանի վարչապետ Նիկոլ Փաշինյանը հայտնելով այդ մասին նշել է, որ միասին կդիտեն ֆուտբոլի ազգային հավաքականների հանդիպումը: Հիշեցնեմ, որ ազգերի Լիգայի փլեյ օֆում հանդիպում են Հայաստանի եւ Վրաստանի հավաքականները: Առաջին խաղն այսօր Երևանում է, իսկ պատասխանը՝ երեք օր անց Թբիլիսիում:
Հետաքրքիր է, Նիկոլ Փաշինյանը կմեկնի՞ պատասխան խաղը դիտելու, ինչպես Երևան է ժամանել Իրակլի Կոբախիձեն:
Անկասկած ողջունելի է, որ Նիկոլ Փաշինյանն ու Իրակլի Կոբախիձեն Երևանում կդիտեն ազգային հավաքականների հանդիպումը: Նաև շատ լավ կլինի, եթե պատասխան խաղը դիտելու համար էլ մեկնի Հայաստանի վարչապետը:
Իհարկե ֆուտբոլն առիթ է այլ հարցեր քննարկելու համար և թերևս կասկած չկա, որ հայ-վրացական բարձր մակարդակի հանդիպմանը՝ ֆուտբոլից առաջ, կքննարկվի մեծ քաղաքականությունը: Այստեղ Երևանն ու Թբիլիսին ունեն քննարկելու ընդհանուր շատ հարցեր ու հետաքրքրություններ:
Մասնավորապես, կովկասյան ռեգիոնի ճակատագրի առումով Հայաստանն ու Վրաստանը թերեւս պետք է գործեն զգալիորեն համատեղ, հաշվի առնելով այն, որ Ադրբեջանն ակնհայտորեն ձգտում է կանգնել եւ դիրքավորվել նրանցից վեր: Ինչպես բազմիցս ասել եմ, չնայած Բաքուն ագրեսիվ հավակնություններ արտահայտում է Հայաստանի հասցեին, բայց կասկած չկա, որ դրանք բավարարելու դեպքում հաջորդը լինելու է Վրաստանը:
Ավելին, բոլորովին պետք չէ բացառել, որ Ադրբեջանը ըստ էության գործի նաեւ երկու ճակատով: Դրա ռեսուրսը Բաքուն ունի անկասկած:
Այստեղ սակայն, հարցը թե Բաքվին զսպելն է, թե ավելի լայն իմաստով՝ կովկասյան ռեգիոնի անվտանգության ապագա ճարտարապետության շուրջ ընդհանուր մոտեցումների ձեւավորումը»:
