ՌԴ-ն ընդլայնել է ԵՄ ներկայացուցիչների ցանկը, որոնց մուտքը Ռուսաստան արգելված է. ԱԳՆ
Ռուսական կողմը, ի պատասխան պատժամիջոցների 16-րդ փաթեթի, ընդլայնում է եվրոպական ինստիտուտների և Եվրամիության անդամ երկրների ներկայացուցիչների ցուցակը, որոնց մուտքը երկիր արգելված է: Այս մասին հայտարարել է Ռուսաստանի արտաքին քաղաքական գերատեսչությունը։
«Ի պատասխան այդ ոչ բարեկամական քայլերի՝ ռուսական կողմը զգալիորեն ընդլայնել է եվրաինտիտուտների և Եվրամիության անդամ երկրների ներկայացուցիչների ցանկը, որոնց 1996 թվականի օգոստոսի 15-ի «Ռուսաստանի Դաշնությունից դուրս գալու և Ռուսաստանի Դաշնություն մուտք գործելու կարգի մասին» Դաշնային օրենքի համաձայն արգելվում է մուտք գործել մեր պետության տարածք»,- ասված է հաղորդագրության մեջ:
Պատժամիջոցների տակ են հայտնվել՝
- ԵՄ ուժային գերատեսչությունների, պետական և առևտրային կազմակերպությունների ներկայացուցիչներ,
- ԵՄ քաղաքացիներ, որոնք պատասխանատու են Ուկրաինային ռազմական օգնության, Բալթիկայում ռուսական նավերի և բեռների շրջափակման համար, ինչպես նաև ՌԴ տարածքային ամբողջականության խախտմանը նպաստող գործունեություն են ծավալում,
- ԵՄ երկրների պետական մարմինների և եվրակառույցների ներկայացուցիչներ, որոնք ներգրավված են ՌԴ պաշտոնատար անձանց հետապնդման մեջ, զբաղվում են Ռուսաստանի ղեկավարության համար «տրիբունալի» ստեղծմամբ, հանդես են գալիս պատժամիջոցներ սահմանելու և ակտիվները բռնագրավելու օգտին,
- քաղաքացիական ակտիվիստներ և գիտական հանրության ներկայացուցիչներ, որոնք աչքի են ընկել ռուսատյաց հռետորաբանությամբ,
- ԵՄ երկրների և Եվրախորհրդարանի պատգամավորներ, որոնք քվեարկել են Ռուսաստանի դեմ բանաձևերի և օրինագծերի օգտին:
Բացի այդ, սև ցուցակում հայտնվել են Եվրոպայի խորհրդի կառույցների առանձին ներկայացուցիչներ, որոնք աչքի են ընկել հակառուսական ակտիվությամբ։
