Ռուսաստանը հայտնել է ՄԱԿ-ի ԱԽ հինգ մշտական անդամների միջև երկխոսության վերսկսման մասին
ՄԱԿ-ի Անվտանգության խորհրդի մշտական անդամների «հնգյակը», չնայած տարաձայնություններին, վերսկսել է երկխոսությունը մի շարք հարցերի շուրջ, РИА Новости-ին տված հարցազրույցում հայտնել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան։
Անվտանգության խորհուրդի կազմում 15 երկիր կա՝ հինգ մշտական անդամ և տասը ժամանակավոր։
Մշտական անդամներն են Ռուսաստանը, ԱՄՆ-ն, Մեծ Բրիտանիան, Չինաստանը և Ֆրանսիան։ Նրանք վետոյի իրավունք ունեն։ Մնացած տասը ընտրվում են երկու տարի ժամկետով։
«Մենք նաև մշտապես հանդես ենք եկել Անվտանգության խորհրդի հինգ մշտական անդամների շրջանակներում համագործակցության ամրապնդման օգտին։ Ի վերջո, սրանք ՄԱԿ-ի հիմնադիր պետություններն են, և նրանք հատուկ պատասխանատվություն են կրում միջազգային խաղաղության և անվտանգության պահպանման համար։ Չնայած օրակարգում առկա աշխարհաքաղաքական բոլոր տարաձայնություններին, կան բազմաթիվ հարցեր՝ թե՛ առօրյա, թե՛ քաղաքական, որոնց շուրջ նրանք համաձայնության են գալիս, և այնպիսի հարցեր, որոնց շուրջ «հնգյակի» անդամներին օգտակար է գոնե կարծիքների փոխանակումը։ Սա բազմակողմ դիվանագիտության բաղկացուցիչ մասն է։ «Պետք է ասել, որ նման երկխոսությունը վերսկսվել է»,- ասել է Նեբենզյան։
