Թուրքիայի արտգործնախարարը պաշտպանել է Պաղեստինի հարցով ԻԿԿ նիստ գումարելու Իրանի գաղափարը
Թուրքիայի արտգործնախարար Հաքան Ֆիդանը իրանցի գործընկերոջ հետ հեռախոսազրույցում գոհունակություն է հայտնել Անկարայի և Թեհրանի հարաբերություններում լավ դինամիկայի առթիվ, հայտնում է Tasnim-ը։
Նա նաև ընդգծել է երկու հարևանների միջև համագործակցության ընդլայնման կարևորությունը փոխադարձ հետաքրքրություն ներկայացնող բոլոր ոլորտներում։ Այնուհետև Ֆիդանն ընդգծել է բոլոր իսլամական երկրների կողմից Պաղեստինի ժողովրդի իրավունքների հետագա աջակցության անհրաժեշտությունը:
Թուրքիայի արտգործնախարարը ողջունել է Իսլամական կոնֆերանս կազմակերպության (ԻԿԿ) արտակարգ նիստ անցկացնելու իրանցի իր գործընկերոջ առաջարկը։
Իր հերթին Իրանի արտաքին գործերի նախարար Աբբաս Արաղչին ընդգծել է երկրների խիստ հակազդեցությունը Գազայից պաղեստինցիների բռնի տեղահանմանը՝ այս դավադրությունն անվանելով Պաղեստինում ցեղասպանության ծրագրի շարունակություն։
Նա շեշտել է իսլամական երկրների կողմից «դավադրությանը հակազդելու համար» հաստատուն և միասնական դիրքորոշման անհրաժեշտությունը և կոչ արել անհապաղ ԻԿԿ նիստ գումարել՝ այս խնդիրը լուծելու համար:
Անդրադառնալով երկկողմ բարեհաջող կապերին՝ Իրանի ԱԳ նախարարը ողջունել է Իրանի և Թուրքիայի միջև վերջին քաղաքական բանակցությունները՝ երկու երկրների փոխարտգործնախարարների նախագահությամբ, դրանք կարևոր և արդյունավետ անվանելով։ Արաղչին ընդգծել է տարբեր ոլորտներում հարաբերությունների ընդլայնման նպատակով կանոնավոր խորհրդակցությունների շարունակման կարևորությունը»,- գրում է իրանական լրատվամիջոցը։
Ավելի վաղ Իսրայելն ու ԱՄՆ-ն գաղափարներ էին հնչեցրել Գազայի հատվածից պաղեստինցիներին մերձավորարևելյան մի շարք պետությունների տարածքներ վերաբնակեցնելու մասին, ինչը առաջացրել էր տարածաշրջանի երկրներիկտրուկ արձագանքը։
