80-ամյա իսրայելցին մեղադրվում է ահաբեկչություն հրահրելու մեջ՝ Նեթանյահուին սպանելու կոչերի համար
Իսրայելի կենտրոնական Նես-Ցիոնա քաղաքի բնակչին մեղադրանք է առաջադրվել երկրի վարչապետի դեմ ահաբեկչություն հրահրելու մեջ՝ սոցցանցերում Բենիամին Նաթանյահուին սպանելու կոչերով գրառումների համար, գրում է Times of Israel-ը։
Ռեհովոտի հաշտարար դատարան ներկայացված մեղադրական եզրակացության համաձայն, 80-ամյա Ամրամ Բեն Հայիմ Ագմոնը 2023 թվականի հոկտեմբերի 10-ին՝ ՀԱՄԱՍ-ի հարձակումից և Գազայում պատերազմը սկսվելուց երեք օր անց, ֆեյսբուքյան իր էջում հրապարակել է հետևյալ գրառումը. «Քանի դեռ չեմ տեսել, թե ինչպես է նրա կտրված գլուխը գլորվում Ազզայի փողոցի իր տան աստիճաններով, արյունս չի սառչի»՝ նկատի ունենալով Նաթանյահուին։
Ինչպես նշում է լրատվամիջոցը, Իսրայելի վարչապետը Երուսաղեմի Ազզա փողոցում բնակարան ունի։
2023 թվականի հոկտեմբերի 17-ին Ագմոնը մեկ այլ գրառում է հրապարակել Նաթանյահուի դեմ, որում ասվում էր․ «Ո՞վ կկանգնի հանուն մեզ, որպեսզի ջրի երես հանենք այս ստհակին և «իմ կնոջը» (նկատի ունի Նաթանյահուի կնոջը՝ Սառային), որպեսզի նրանք մահապատժի ենթարկվեն և ազատեն Իսրայելի ժողովրդին այն դժբախտությունից, որ պատճառում են մեզ»։
Դատախազները Ագմոնին մեղադրանք են առաջադրել 2016 թվականի Ահաբեկչության դեմ պայքարի մասին օրենքի ահաբեկչություն հրահրելու երեք հոդվածով այդ գրառումների և ևս երկուսի համար, որոնք հրապարակվել էին նույն ամսում։
Այս հանցանքը պատժվում է մինչև երեք տարի ազատազրկմամբ։
