Թուրքիան ու Իսրայելը կարող են վերսկսել առևտուրը
Թուրքիայի արտաքին տնտեսական կապերի կոմիտեի (DEIK) նախագահ Նաիլ Օլթաքը տեղեկացրել է, որ Իսրայելի հետ առևտրատնտեսական հարաբերությունները կարող են վերականգնվել: Այս մասին տեղեկացնում է ermenihaber.am-ը։
Ըստ թուրք պաշտոնյայի՝ դա կարող է տեղի ունենալ միայն այն դեպքում, երբ Գազայում հաստատված հրադադարը մնայուն բնույթ կկրի:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան Գազայում տեղի ունեցածի համատեքստում ստիպված է եղել խզել Իսրայելի հետ առևտրային հարաբերությունները, որոնց տարեկան ծավալը հասել էր 9.5 միլիարդ ԱՄՆ դոլարի։
Հիշեցնենք, որ Իսրայելի ռազմաքաղաքական կաբինետը հավանություն էր տվել պաղեստինյան «ՀԱՄԱՍ» խմբավորման հետ Գազայի հատվածում հրադադարի և պատանդների ազատ արձակման մասին համաձայնագրին, որն ուժի մեջ է մտել հունվարի 19-ից։
