Մարդիկ Ջերմուկում սուրճ խմելու փոխարեն գնում են Հռոմ. Փաշինյանը` շենգեն վիզաների մասին
Հայաստանից դեպի Եվրամիություն ուղևորահոսքերն անգամներով են ավելացել, ինչը մի քանի պատճառ ունի. այս մասին ՀՀ կառավարության նիստի ժամանակ այսօր հայտարարեց Նիկոլ Փաշինյանը։
Նա նշեց, որ այսօր դեպի ԵՄ երկրներ վիզաներ ստանալու մեծ խնդիր կա. դեսպանատներում մեծ հերթեր են առաջացել, որը մեծ դժգոհություններ է ստեղծել հանրության շրջանում։
«Պետք է նշել, որ պատիկներով ու անգամներով ավելացել են ՀՀ-ից դեպի ԵՄ երկրներ ուղևորահոսքերը։ Եթե դեսպանատները պետք է, ըստ իրենց կանխատեսումների, 300 մարդու վիզայի հարց լուծեին, հիմա ստիպված են լինում 3000-ի հարց քննարկել»,- ասաց Փաշինյանը։
Նա, սակայն, ուղևորահոսքերի ավելացման պատճառ է համարում ոչ թե արտագաղթը, այլ՝ բարեկեցությունը.
«Սա առաջին հերթին ավիացիոն ոլորտում մեր բարեփոխումների արդյունքն է, որ մենք ինչքան էլ սխալվել ենք, ընկել ենք, ձախողվել ենք, սակայն մենք մեր քաղաքացիների համար բացել ենք հնարավորություններ։ Մարդիկ այսօր ասում են` ինչո՞ւ գնանք, ասենք, Ջերմուկում սուրճ խմենք կամ ճաշենք, եթե կարող ենք գնալ Հռոմ, Ֆրանկֆուրտ, Բրյուսել։ Սրա մեջ չափազանցություն չկա։ Սոցիալական ցանցերը թերթեք. սեզոններ կան` շաբաթ-կիրակի մարդիկ ՀՀ մարզերից ավելի քիչ լուսանկարներ են դնում, քան եվրոպական մայրաքաղաքներից»։
Նա նշեց, որ եթե մարդը որոշում միայնակ կամ ընտանիքով գնալ Եվրոպա, նշանակում է, որ գումար ունի, որը նաև սպառողական մտածելակերպի փոփոխության արդյունք է։
Փաշինյանն ընդգծեց, որ այս տարի, օրինակ, դեպի Վրաստան, ի տարբերություն նախորդ տարիներ, հերթեր չեն գոյացել։
«Մարդկանց մի զգալի զանգված Ամանորին օդային տրանսպորտով գնացել է կա՛մ ԵՄ, կա՛մ Մերձավոր Արևելք։ Սա հստակ խոսում է բարեկեցության մասին։ Երբ մարդը սկսում է գումարը ծախսել ավելի նպատակաուղղված, օրինակ` 5 տարվա օճառ, շաքարավազ չի գնում, այլ որոշում է այդ գումարը ծախսել հանգստի վրա, սա էլ է բարեկեցության ձև»,- ասաց նա։
