Իսրայելը առաջիկա մի քանի տարիների ընթացքում կվերանա. ԻՀՊԿ
Իսրայելն անպայման կվերանա առաջիկա մի քանի տարիների ընթացքում, ըստ իրանական Tasnim գործակալության՝ դրա մասին հայտարարել է Իսլամական հեղափոխության պահապանների կորպուսի (ԻՀՊԿ) հրամանատարի տեղակալ, փոխծովակալ Ալի Ֆադավին:
Իսլամական հեղափոխության պահապանների կորպուսի գիտական նվաճումների ցուցահանդես այցելելիս լրագրողների հետ զրույցում փոխծովակալ Ալի Ֆադավին չորեքշաբթի քննադատել է Իսրայելին՝ Գազայի հատվածում գործողությունների համար: «Հաշվի առնելով սկսված գործընթացը՝ սիոնիստական ռեժիմ անունով ռեժիմը առաջիկա մի քանի տարիների ընթացքում անկասկած գոյություն չի ունենա»,- հայտարարել է ԻՀՊԿ-ի բարձրաստիճան զինվորականը։
Իսրայելն անվանելով «աշխարհի ամենադաժան վարչակարգը՝ վերջին 15 ամիսների ընթացքում իր կատարած վայրագությունների պատճառով», ԻՀՊԿ փոխծովակալը հայտարարել է, որ բռնապետությունը երբեք հավերժ չի լինում:
