Գերմանիան իր զինված ուժերի թվաքանակը կհասցնի 230 հազարի՞
Գերմանիան, ըստ ամենայնի, իր զինված ուժերի թվաքանակը կհասցնի 230 հազարի` ներկայիս 203 հազարի փոխարեն, ըստ Reuters-ի՝ չորեքշաբթի հայտարարել է Գերմանիայի պաշտպանության նախարար Բորիս Պիստորիուսը:
Գերմանիայի զինված ուժերը (Բունդեսվերը) ներկայում ունեն մոտ 180 հազար «համազգեստավոր» զինվոր, ինչը մոտ 20 հազարով պակաս է ընթացիկ ցուցանիշից, քանի որ նրանք տարիներ շարունակ պայքարել են մարդկանց բանակ զինվորագրելու համար:
«Մենք նախատեսում ենք ավելացնել համազգեստավոր անձնակազմի թիվը մինչև 203 հազար և, հավանաբար, կմոտենանք 230 հազարին՝ ՆԱՏՕ-ի կարողությունների ավելացման կապակցությամբ»,-հայտարարել է Պիստորիուսը խորհրդարանում:
ՆԱՏՕ-ն մտադիր է համաձայնության գալ 2025 թվականին դաշնակից ուժերի թվաքանակի և սպառազինությունների նոր և ավելի կոշտ թիրախների շուրջ, ինչն, ըստ դաշինքի, արտացոլում է Ուկրաինայի վրա Ռուսաստանի լայնամասշտաբ հարձակումից հետո անվտանգության իրավիճակի վատթարացումը: Reuters-ն ավելի վաղ հայտնել էր, որ ՆԱՏՕ-ի ծրագրավորողները կարծում են, որ դաշինքին անհրաժեշտ կլինի 35-50 լրացուցիչ բրիգադ՝ ռուսական հարձակմանը դիմակայելու համար: Բրիգադը բաղկացած է 3000-7000 զինվորից, ինչը նշանակում է 105 հազարից մինչև 350 հազար զինվոր:
Ըստ այդ սցենարի՝ Գերմանիային, որը սովորաբար ապահովում է ՆԱՏՕ-ի կարողությունների մոտ 10%-ը, անհրաժեշտ կլինի 3- 5 լրացուցիչ բրիգադ կամ 20 հազարից մինչև 30 հազար հավելյալ զորք: Ըստ էության, սա ևս մեկ դիվիզիա է՝ ի լրումն այն երեք դիվիզիաների, որոնց վերազինման ուղղությամբ ներկայում աշխատում է Բեռլինը:
