Պանիկա չկա. առայժմ նորություններ չունենք. Ռանչպարի ղեկավարը՝ հնարավոր սահմանահատների մասին
Դեկտեմբերի 12-ին ՀՀ Ազգային անվտանգության ծառայությունը Հայաստան-Թուրքիա սահմանի հատման հավանական փորձի վերաբերյալ հաղորդագրություն էր տարածել։
«ՀՀ ԱԱԾ-ում տվյալներ են ստացվել ս.թ. դեկտեմբերի 11-ին՝ ժամը 03:20-ի սահմաններում, Հայաստանի Հանրապետության և Թուրքիայի Հանրապետության պետական սահմանի Արարատի մարզի Ռանչպար բնակավայրի հատվածում ՀՀ պետական սահմանի ապօրինի հատման հավանական փորձի վերաբերյալ, որի ստուգման կապակցությամբ ներկայումս իրականացվում են անհրաժեշտ օպերատիվ-հետախուզական միջոցառումներ»,- նշված էր ԱԱԾ հաղորդագրության մեջ:
Մինչև այս պահը ԱԱԾ կողմից դեռևս պաշտոնապես չի հաստատվել՝ ի վերջո, սահմանը ինչ-որ անձինք հատե՞լ են, թե՞ ոչ։ Մինչդեռ խոսակցություններ են շրջանառվում, որ Ռանչպարում բնակիչներն անորոշության մեջ են, հատկապես, որ ո՛չ հերքվել, ո՛չ էլ հաստատվել է այդ տեղեկությունը։
168.am-ի հետ զրույցում Ռանչպար բնակավայրի վարչական ղեկավար Վահան Վարդանյանն ասաց, որ սահմանին ապրող բնակիչները նման բաների սովոր են, հետևաբար՝ չեն ահաբեկվել։
«Ես միայն բնակիչների մասով կարող եմ ասել՝ ամեն ինչ նորմալ է գյուղում, պանիկա, լարվածություն չկա։ Այդ առումով որևէ բնակչի մոտ խնդիր չկա։ Իսկ մնացած հարցերի մասով ԱԱԾ-ն պաշտոնական հաղորդագրություն էր տարածել։ Մենք էլ այդքանը գիտենք, առայժմ նորություններ չունենք»,- նշեց Ռանչպարի վարչական ղեկավարը։
Ըստ նրա, Ռանչպարը սահմանամերձ գյուղ է, ու չի բացառվում, որ տարվա ընթացքում 1-2 երկու դեպք լինի, կամ երկու տարին մեկ։
«Սովորական երևույթ է։ Ինքս, արդեն 3 տարի է՝ վարչական ղեկավար եմ, սակայն նման դեպք չէր եղել, որևէ մեկը սահմանը չի հատել»,- հավելեց նա։
