Պետդեպարտամենտը խուսափել է պատասխանել Ռուսաստանի սառեցված ակտիվների բռնագրավմանն առնչվող հարցին
ԱՄՆ-ի պետքարտուղարի կառավարման և ռեսուրսների գծով տեղակալ Ռիչարդ Վերման խուսափել է պատասխանել այն հարցին, թե արդյո՞ք ԱՄՆ-ի իշխանությունները դիտարկում են ռուսական սառեցված ինքնիշխան ակտիվները փաստացի բռնագրավելու հնարավորությունը՝ դրանք Ուկրաինային աջակցելու նպատակով օգտագործելու համար։ Այդ մասին տեղեկացնում է «ՌԻԱ Նովոստի»-ն։
«Կարող եմ նորից ասել G7 երկրների կողմից Ռուսաստանի Դաշնության սառեցված ակտիվներից ստացված վարկի մարումով նախագծի մասին: Այն իր տեսակի մեջ առաջինն է: Սա ռուսական սառեցված ակտիվների օգտագործման պատմական նախադեպ է»,- ասել է Վերման՝ պատասխանելով այն հարցին, թե արդյոք քննարկում են ԱՄՆ-ի կողմից ռուսական ակտիվների բռնագրավումը։
Ելույթ ունենալով Վաշինգտոնի ռազմավարական և միջազգային հետազոտությունների վերլուծական կենտրոնում՝ Վերման հավելել է, որ Վաշինգտոնը կարծում է, որ Ռուսաստանը պետք է վճարի Ուկրաինային հասցված վնասի համար։
