«Կառավարության համար հետևանքներ կլինեն». Ֆրանկ-Վալտեր Շտայնմայերը` Սալոմե Զուրաբիշվիլիին
Գերմանիայի դաշնային նախագահ Ֆրանկ-Վալտեր Շտայնմայերը հեռախոսազրույց է ունեցել Վրաստանի նախագահ Սալոմե Զուրաբիշվիլիի հետ: Ֆրանկ-Վալտեր Շտայնմայերը դատապարտել է ցուցարարների դեմ բռնությունները և համերաշխություն հայտնել վրաց հասարակությանը: Այս մասին հաղորդել է Գերմանիայի դաշնային նախագահի մամուլի քարտուղար Քերստին Գամմելին։
Նախագահական մամուլի ծառայությունից նաև նշել են, որ Վրաստանը շեղվում է դեպի ԵՄ տանող սահմանադրական հանձնառությունից. «Կառավարության համար հետևանքներ կլինեն, բայց Եվրոպան բաց է մնում քաղաքացիական հասարակության եվրոպական հույսերի համար»:
Արդեն հինգերորդ օրն է, ինչ Վրաստանի մի շարք քաղաքներում ընթանում են հակաիշխանական սուր դրսևորումներով բողոքի ակցիաներ, ցուցարարները անգամ մոլոտովի կոկտեյլներ են գործածում: Վրաստանում կրքերը բորբոքվեցին հատկապես այն բանից հետո, երբ Վրաստանի վարչապետ Իրակլի Կոբախիձեն հայտարարեց մինչև 2028 թվականը Եվրոպական Միությանն անդամակցելու շուրջ բանակցությունները սառեցնելու որոշման մասին։
