Իրանի նախագահը Իրաքի վարչապետին հայտնել է Սիրիայում ահաբեկիչների դեմ պայքարում համագործակցելու պատրաստակամության մասին
Իրաքի վարչապետ Մուհամեդ Շիադ Ալ-Սուդանիի հետ հեռախոսազրույցում Իրանի նախագահ Մասուդ Փեզեշկիանը հայտարարել է, որ իր երկիրը պատրաստ է համագործակցել Սիրիայում ահաբեկչական հարձակումների դեմ պայքարում, գրում է Mehr-ը։
«Իրանը պատրաստ է ցանկացած համագործակցության այս ահաբեկչությունների դեմ պայքարում», – կիրակի Մուհամեդ Շիադ Ալ-Սուդանիի հետ հեռախոսազրույցում հայտարարել է Մասուդ Փեզեշկիանը։
Իրանի նախագահն ընդգծել է, որ Սիրիայի նման երկրների տարածքային ամբողջականության պահպանումն Իրանի Իսլամական Հանրապետության տարածաշրջանային ռազմավարությունն է՝ հավելելով, որ «մինչ Լիբանանում հրադադարից հետո տարածաշրջանը գնում էր դեպի հարաբերական խաղաղություն, և ուշադրությունը կենտրոնացած էր Գազայի վրա, Սիրիայում վերջին զարգացումները լուրջ մտահոգություններ են առաջացրել տարածաշրջանային անվտանգության վերաբերյալ»:
«Այս միջադեպերը (Սիրիայում) սիոնիստական ռեժիմի չարամիտ ծրագրերի մի մասն են՝ ուղղված իսլամական երկրներում անկայունությունը, պառակտումը և հակամարտությունը մեծացնելուն, ինչը հանգեցրել է իսլամական ումմայի միավորման և համատեղ ջանքերի անհրաժեշտությանը տարածաշրջանում ահաբեկչական հոսանքների տարածումը կանխելու համար»,- հավելել է Փեզեշկիանը:
Իրաքի վարչապետն իր հերթին անհանգստություն է հայտնել Սիրիայի հյուսիսում անապահով իրավիճակի ստեղծման կապակցությամբ՝ ահաբեկչական խմբավորումների վերջին տեղաշարժերը գնահատելով որպես Իսրայելի կողմից անվտանգությունը խաթարելու և Սիրիայի ինքնիշխանությունն ու տարածքային ամբողջականությունը խախտելու փորձ։
