Նյու Յորքի իշխանությունները երաշտի պատճառով կոչ են արել բնակիչներին խնայել ջուրը
Նյու Յորքի իշխանությունները հայտարարել են ամբողջ քաղաքում երաշտի վտանգի մասին։ Քաղաքապետի կայքի համաձայն, անցած հոկտեմբերին Նյու Յորքում գրանցվել է 1869 թվականից ի վեր երկրորդ տևական առանց տեղումների ժամանակահատվածը։
Քաղաքապետ Էրիկ Ադամսը կոչ է արել բնակիչներին հնարավորինս խնայել ջուրը: Իշխանությունները նաև կարգադրել են քաղաքային ծառայություններին անցնել խնայողությունների ռեժիմի: «Հիմա սկսելով ջրի խնայողությունը՝ մենք անում ենք ամեն ինչ, որպեսզի համոզվենք, որ ամռանը կարող ենք ջրել զբոսայգիները և լողավազանները ջրով լցնել և կանխել ավելի ծանր երաշտի իրավիճակը», – ասել է Ադամսը:
Ինչպես նշում է The New York Times-ը, քաղաքի իշխանությունների կոչը դեռևս չի ներառում նյույորքցիների կողմից ջրի օգտագործման որևէ սահմանափակում։
Ջրի խնայողության վերաբերյալ խորհուրդներ են հրապարակվել քաղաքապետարանի կայքում։ Դրանց թվում են սովորականից ավելի արագ ցնցուղ ընդունելը, սպասքը լվանալիս ջուրն անջատելը, վնասված ծորակների նորոգումը և հրդեհային հիդրանտների արտահոսքի մասին հաղորդումներ անելը:
