Իրանի գերագույն առաջնորդը բոլոր մուսուլմաններին միավորվելու կոչ է արել
Իրանի գերագույն առաջնորդ այաթոլա Ալի Խամենեին վերջին հինգ տարվա ընթացքում առաջին անգամ վարել է ուրբաթօրյա աղոթքը, որին Թեհրանում մասնակցել են հազարավոր մարդիկ։
Mehr գործակալությունը հաղորդում է, որ մինչև աղոթքը տեղի է ունեցել Իսրայելի կողմից սպանված «Հեզբոլլահ»-ի ղեկավարի՝ Հասան Նասրալլահի հիշատակի արարողությունը։
«Տարածաշրջանում դիմադրության ուժերը հետ չեն կանգնի՝ նույնիսկ իրենց առաջնորդների սպանության դեպքում», – ասել է Խամենեին՝ իր խոսքում հիշատակելով Նասրալլահին։
Իսլամական հեղափոխության առաջնորդը բոլոր մուսուլմաններին կոչ է արել միավորվել՝ նշելով, որ իրենց բոլորի թշնամին նույնն է։2023 թ. հոկտեմբերի 7-ին Իսրայելի վրա պաղեստինյան ՀԱՄԱՍ արմատական շարժման հարձակմանն անդրադառնալով՝ Խամենեին նշել է, որ այդ գործողությունն «օրինական» քայլ էր, և որ պաղեստինցիներն իրավացի էին։
Այաթոլա Ալի Խամենեին գովաբանել է Իրանի զինված ուժերին Իսրայելի ռազմական օբյեկտներին հոկտեմբերի 1-ին հասցրած հարձակման համար՝ դա անվանելով օրինական, և հավելել է, որ Իրանը «ո՛չ հետաձգելու է, ո՛չ էլ շտապելու է կատարել իր պարտականությունները»։
