Աֆղանստանում 3 տարվա ընթացքում 1,4 մլն աղջիկ զրկվել է դպրոցական կրթություն ստանալու հնարավորությունից
Աֆղանստանում թալիբների իշխանության գալու վերջին երեք տարվա ընթացքում շուրջ 1,4 միլիոն աղջիկ չի կարողացել միջնակարգ կրթություն ստանալ: Այս մասին հաղորդել է ՅՈՒՆԵՍԿՕ-ն:
«Դե ֆակտո իշխանությունների կողմից սահմանված արգելքի հետևանքով 2021 թվականից ի վեր առնվազն 1,4 միլիոն աղջիկ զրկված է եղել միջնակարգ կրթություն ստանալու հնարավորությունից», – ասվում է մամուլի տեղեկագրում։
«Աֆղանստանը միակ երկիրն է աշխարհում, որը 12-ից բարձր տարիքի աղջիկներին ու կանանց արգելում է կրթություն ստանալ: Մենք չպետք է անտարբեր մնանք այս խնդրի նկատմամբ: Կրթության իրավունքը պետք է լինի համընդհանուր», – հայտարարել է ՅՈՒՆԵՍԿՕ-ի գլխավոր տնօրեն Օդրի Ազուլեն։
ՅՈՒՆԵՍԿՕ-ի տվյալներով՝ Աֆղանստանում խնդիրներ կան նաև տարրական կրթության հետ կապված: Այսպես, չնայած այն բանին, որ 12-ից ցածր տարիքի աղջիկներին, ընդհանուր առմամբ, Աֆղանստանում թույլատրվում է կրթություն ստանալ, սակայն 2021 թվականից ի վեր տարրական դպրոցներում սովորողների ընդհանուր թիվը ևս զգալիորեն նվազել է:
2022 թվականին տարրական դպրոցներում սովորում էր 5,7 միլիոն տղա և աղջիկ, ինչը 1,1 միլիոնով պակաս է, քան 2019 թվականին՝ մինչև թալիբների իշխանության գալը։
«Տարրական դպրոցում սովորողների թվի նվազումը դարձել է դե ֆակտո իշխանությունների որոշման արդյունքը` արգելել կին ուսուցիչներին ուսուցանել տղաներին», – հավելել են ՅՈՒՆԵՍԿՕ-ում։
Օգոստոսի 14-ին թալիբները զորահանդես են անցկացրել՝ նվիրված Աֆղանստանում իշխանության գալու երրորդ տարեդարձին։2021 թ. օգոստոսին թալիբները, չհանդիպելով դիմադրության, գրավեցին Աֆղանստանի գրեթե ողջ տարածքը, ներառյալ խոշորագույն քաղաքները։
Խմբավորման զինյալները օգոստոսի 15-ին մտան երկրի մայրաքաղաք Քաբուլ և վերադարձան իշխանության։
Իշխանության գալուց ի վեր թալիբներն զգալիորեն սահմանափակել են աղջիկների ու կանանց համար սովորելու և աշխատելու հնարավորությունները:
