Շառլ Ազնավուրի արձանը կտեղադրվի Ազնավուրի հրապարակում․ արձանի ձեռքբերումը կարժենա 85 միլիոն 185.840 դրամ
Ամիսներ առաջ Երևանի քաղաքապետարանն ամփոփել էր աշխարհահռչակ շանսոնյե, ՀՀ Ազգային հերոս Շառլ Ազնավուրի հուշարձանի համար հայտարարված բաց մրցույթը և տեղեկացրել՝ քանդակագործ Դավիթ Մինասյանի հեղինակած «Լա Բոհեմ» ստեղծագործությունն 9 ձայնով առաջ է անցել մնացած տարբերակներից։
«Սա Շառլ Ազնավուրի 100-ամյակին նվիրված կարևոր կատարվելիք աշխատանքներից մեկն էր»,- հայտարարել էր քաղաքապետ Տիգրան Ավինյանը,- Վստահ եմ, որ այս քանդակն իրապես արտացոլելու է այն էներգիան, որը Ազնավուրը իր կյանքի ընթացքում փոխանցել է մեզ»։
Տեղեկացրել էին նաև, որ հուշարձանը տեղադրվելու է Ֆրանսիայի հրապարակում։
Օրերս պետգնումների էլեկտրոնային armeps համակարգում հանրայնացվել էր Դավիթ Մինասյան ԱՁ-ի և Երևանի քաղաքապետարանի միջև կնքված պայմանագիրը, որից տեղեկացանք՝ արձանը տեղադրվելու է Շառլ Ազնավուրի հրապարակում։ 85 միլիոն 185.840 դրամ կարժենա արձանի «պատրաստումն ու մատակարարումը»։
«Պետք է ապահովվի արձանի գեղարվեստատեխնիկական հետևյալ լուծումները՝ հուշարձանի պատվանդանի բացակայությունն ու օդային լուծումը պետք է ներդաշնակ ձուլվի Ազնավուրի հրապարակի ճարտարապետության հետ՝ չծանրաբեռնելով հագեցած միջավայրը»,- ի թիվս այլ դիտարկումների՝ ասվում է պայմանագրի տեխնիկական բնութագրում։
