Պուտինը աշխատանքից ազատել է Լավրովի տեղակալին, ով վերահսկում էր Եվրոպայի հետ հարաբերությունները
ՌԴ նախագահ Վլադիմիր Պուտինը պաշտոնից ազատել է ՌԴ ԱԳ նախարարի առաջին տեղակալ Վլադիմիր Տիտովին։ Պետության ղեկավարի համապատասխան հրամանագիրը հրապարակվել է իրավական տեղեկատվության պորտալում։ Դիվանագետի պաշտոնանկության պատճառը փաստաթղթում նշված չէ։
Տիտովը ծնվել է 1958 թվականին Մոսկվայում, նա 66 տարեկան է։ Քաղաքացիական ծառայության տարիքային շեմը 65 տարին է, սակայն որոշ կատեգորիաների քաղաքացիական ծառայողների, մասնավորապես ղեկավարների համար այն կարող է երկարացվել մինչև 70 տարի:
2023 թվականի մայիսին Պուտինը մեկ տարով երկարաձգեց Տիտովի պաշտոնավարման ժամկետը։ Նույնը նա արել է Ռուսաստանի փոխարտգործնախարար Սերգեյ Վերշինինի և ԱԳՆ գլխավոր տնօրեն Սերգեյ Վյազալովի առնչությամբ։
2013 թվականի ապրիլից, որպես արտաքին գործերի փոխնախարար, Տիտովը ղեկավարում է վարչական, կադրային, հյուպատոսական հարցերը, ինչպես նաև եվրոպական երկրների հետ հարաբերությունները։
Տիտովի պաշտոնանկությունը համընկավ Ռուսաստանի և Եվրամիության միջև հարաբերությունների սրման նոր փուլի հետ։ Մասնավորապես, ԱՄՆ-ն Գերմանիայի հետ պայմանավորվել է մինչև 2026 թվականը երկիր փոխանցել հեռահար հրթիռներ, որոնք պոտենցիալ կարող են հարվածել Ռուսաստանի տարածքին։
Պուտինն արձագանքել է՝ նախազգուշացնելով, որ եթե փոխանցումը տեղի ունենա, Մոսկվան կհանի կարճ և միջին հեռահարության հրթիռների (INF) տեղակայման մորատորիումը, այդ թվում՝ Ռուսաստանի ռազմածովային նավատորմի նավերի վրա։
«Այսօր մի շարք նման համակարգերի մշակումը վերջնական փուլում է։ Մենք հայելային միջոցներ կձեռնարկենք դրանք տեղակայելու համար՝ հաշվի առնելով ԱՄՆ-ի և նրա արբանյակների գործողությունները Եվրոպայում և աշխարհի այլ տարածաշրջաններում»,- ասել է Պուտինը։
Միաժամանակ նախագահը հիշեցրել է, որ ավելի վաղ՝ զորավարժությունների ընթացքում, ԱՄՆ-ն արդեն կիրառել է հրթիռային համակարգերի փոխանցում իր տարածքից Դանիա և Ֆիլիպիններ։ «Այս իրավիճակը հիշեցնում է Սառը պատերազմի իրադարձությունները՝ կապված Եվրոպայում ամերիկյան «Պերշինգ» միջին հեռահարության հրթիռների տեղակայման հետ»,- եզրափակել է Պուտինը։
Ավելի վաղ Գերմանիայի կանցլեր Օլաֆ Շոլցն ընդգծել էր, որ ամերիկյան հեռահար հրթիռները զսպող միջոց են «որպեսզի պատերազմ չսկսվի»։ Բեռլինը պատրաստ է հրաժարվել նման որոշումից, բայց միայն այն դեպքում, եթե Ռուսաստանը դադարեցնի ռազմական գործողությունները Ուկրաինայում, ընդգծել է Շոլցը։
