Լիբանանը ՄԱԿ-ի ԱԽ-ին կդիմի Մերձավոր Արևելքում հակամարտության սրման մտավախությունների պատճառով
Լիբանանի արտգործնախարարությունը մտադիր է բողոք ներկայացնել ՄԱԿ-ի Անվտանգության խորհրդին՝ երկրի տարածքի ուղղությամբ Իսրայելի կողմից հաճախակի դարձած գրոհների պատճառով, քանի որ իրադրության սրումը կարող է ամբողջ տարածաշրջանը ներքաշել պատերազմի մեջ։ Այդ մասին հաղորդել է Լիբանանի ԱԳՆ-ն X սոցիալական հարթակում։
«Հատկապես մտահոգիչ է այն փաստը, որ այս էսկալացումն ընդգրկում է մեր այն շրջանները, որոնք հեռու են Լիբանանի հարավային սահմաններից, ինչը վկայում է հակամարտությունն ընդլայնելու և ամբողջ տարածաշրջանը պատերազմի մեջ ներքաշելու՝ Իսրայելի ցանկության մասին», – ասվում է գերատեսչության հայտարարության մեջ:
Նշվում է, որ Իսրայելի հարձակումները Լիբանանի վրա դարձել են ավելի հաճախակի և սահմաններից ավելի հեռու, ինչպես նաև դարձել են ավելի դաժան, և հենց այդ պատճառով Լիբանանը մտադիր է բողոք ներկայացնել։
Գերատեսչությունում նաև կոչ են արել միջազգային հանրությանը՝ ճնշում գործադրել Իսրայելի վրա՝ դադարեցնելու այդ հարձակումները, ինչպես նաև հերթական անգամ դիմել են ՄԱԿ-ի Անվտանգության խորհրդին՝ խնդրելով դատապարտել Իսրայելի գործողությունները։
