Սանկտ Պետերբուրգում 165 մլն ռուբլու կոկաին են գտել Բելգիայից փոխադրված բանանի բեռնարկղերում
Սանկտ Պետերբուրգի մաքսավորները մաքսանենգ ճանապարհով փոխադրված թմրանյութերի խոշոր խմբաքանակ են հայտնաբերել: Այս մասին հաղորդում է «Ինտերֆաքս» գործակալությունը։
«Հյուսիսարևմտյան մաքսավորները 11 կգ կոկաին են գտել բանանների մեջ։ Մաքսանենգությունը կասեցվել է Սանկտ Պետերբուրգի Մեծ նավահանգստի տարածքում։ Սև շուկայում թմրանյութի արժեքը գերազանցում է 165 միլիոն ռուբլին»,- հայտարարել է Ռուսաստանի Դաշնային մաքսային ծառայությունը։
Բելգիայի Անտվերպեն քաղաքից փոխադրված բեռնարկղում հայտնաբերվել են փոշի պարունակող բրիկետներ։ Հարուցվել է քրեական գործ։
Տարեսկզբից ի վեր սա մաքսանենգ ճանապարհով փոխադրված թմրանյութերի արդեն չորրորդ խոշոր խմբաքանակն է, որը Սանկտ Պետերբուրգի մաքսավորներին հաջողվել է բացահայտել։
Ըստ ՌԴ հյուսիսարևմտյան օպերատիվ մաքսատան կողմից հունվարի վերջին ներկայացված տվյալների՝ 2024 թ․ սկզբից Անվտանգության դաշնային ծառայության Սանկտ Պետերբուրգի և Լենինգրադի մարզի վարչության աշխատակիցների հետ փոխգործակցության արդյունքում անօրինական շրջանառությունից առգրավվել է ավելի քան 2 տոննա թմրանյութ, ինչը ռեկորդային ցուցանիշ է։
Անցյալ տարի անօրինական շրջանառությունից առգրավվել է ավելի քան 2,5 տոննա թմրանյութ։
