Հյուսիսային Մակեդոնիայի ազգային թիմի ֆուտբոլիստը միացել է «Ալաշկերտ»- ին
Երևանի «Ալաշկերտ»-ի կազմը համալրել է Հյուսիսային Մակեդոնիայի ազգային հավաքականի ձախ եզրային Ստեֆան Աշկովսկին:
Այս մասին հայտնում է ակումբի մամուլի ծառայությունը: Ակումբային կարիերայի ընթացքում ֆուտբոլիստը հանդես է եկել Բելգրադի «Պարտիզանում»,Նիդերլանդների «Ֆորտունայում», Սոֆիայի «Սլավիայում», ռումինական «Բոտոշանիում» և «Սեպսիում», հունական «Լամիայում» և այլ ակումբներում:
31-ամյա Աշկովսկին ներկայացրել է Հյուսիսային Մակեդոնիայի պատանեկան և երիտասարդական հավաքականները, 26 հանդիպման է մասնակցել իր երկրի ազգային թիմում՝ որոնցից երեքում մրցել է Հայաստանի հավաքականի հետ: «Ալաշկերտի» նորեկը Սերբիայի չեմպիոն և Ռումինիայի գավաթակիր է:
Հայաստանի ֆուտբոլի առաջնության երկրորդ հատվածը կվերսկսվի փետրվարի 22-ին: Պրեմիեր լիգայի 21-րդ տուրի շրջանակներում կկայանան «Շիրակ»-ԲԿՄԱ, «Նոա»-«Ուրարտու», «Ալաշկերտ»-«Վան», «Արարատ-Արմենիա»-«Փյունիկ», «Արարատ»-«Վեստ Արմենիա» հանդիպումները:
Հայաստանի ֆուտբոլի առաջնության 20-րդ տուրից հետո մրցաշարային աղյուսակի առաջատարը 48 միավորով «Փյունիկ»-ն է: Երկրորդ և երրորդ տեղերը զբաղեցնում են «Նոա»-ն և«Արարատ-Արմենիա», որոնք ունեն 42-ական միավոր: 4-րդ տեղում «Ուրարտու»-ն է, որը հավաքել է 34 միավոր: Երկու միավոր քիչ` 32 միավոր ունի «Ալաշկերտ»-ը: Այնուհետ միմյանց հաջորդում են ԲԿՄԱ-ն, «Արարատ»-ը, «Վեստ Արմենիա»-ն, «Վան»-ը, «Շիրակ»-ը:
