160․000 դրամ դարձնելը ճիշտ չէր, գուցե պետք էր 660․000 դարձնել․ Գևորգ Դանիելյան
ՀՀ արդարադատության նախկին նախարար Գևորգ Դանիելյանը ֆեյսբուքյան իր էջում գրում է․ «Դատելով խցանումներից ու կայանատեղերում ազատ տեղերի բացակայությունից, վճարը 160 հազար դրամ դարձնելը ճիշտ չէր, գուցե պետք էր 660 հազար դարձնել։ Եթե լուրջ՝ հարկերը, տուրքերը և վճարումները բազմապատիկ անգամ բարձրացնելով բյուջեն արհեստականորեն մեծացնելու փոխարեն, անհրաժեշտ է ընդամենը սրտացավ ու պրոֆեսիոնալ վերաբերմունք։
Օրինակ՝ խցանումների խնդիրը մեղմելու համար հարկ է մեծաքանակ պարեկների պահպանությանն ուղղված ծախսերն ուղղել խաչմերուկներում ինքնաբավ կարգավորիչ «խելացի լուսացույցներ» տեղադրելու, էլեկտրոնային վարչարարության միջոցով մարդկանց՝ ժամանակատար և մեծ ծախսեր խլող անիմաստ տեղաշարժերը կանխելու (մարդիկ ճարահատյալ են այցելում այս կամ պետական կամ տեղական ինքնակառավարման մարմին, զբաղվում կատարյալ անիմաստ թղթաշրջանառությամբ), ուրբանիզացիոն երևույթները, այդ թվում՝ հազարավոր շինթույլտվություններն անհապաղ բացառելու, ստորգետնյա կայանատեղիներ կառուցելու և նմանաբնույթ այլ գործիքակազմով։ Այդ դեպքում բյուջեն անհամեմատ ավելի մեծ կլինի, քանի որ դա կնպաստի հսկայական գումարների խնայողությանը, տնտեսության հեռանկարային զարգացմանը՝ դրանից բխող գրավիչ հետևանքներով հանդերձ ….»։
