Իմ ներկայացուցիչներն այցելել են Նորատուսում ձերբակալված անձանց. ՄԻՊ-ը դեռևս հստակ գնահատական չունի
«Մենք այս հարցի հետ կապված արդեն իսկ ուսումնասիրություն սկսել ենք՝ երեկվա իրադարձությունները սկսելուց անմիջապես հետո»,- կառավարության նիստից հետո անդրադառնալով Գեղարքունիքի մարզի ձկնորսների խնդրին, Նորատուս համայնքի 26 ձկնորսների ձերբակալությանը՝ նշեց ՄԻՊ Անահիտ Մանասյանը:
Նա նաև տեղեկացրեց՝ իր ներկայացուցիչներն արդեն այցելել են ձերբակալված ձկնորսներին։
«Մենք լսել ենք նաև նրանց մտահոգությունները: Այս պահին ուսումնասիրում ենք խնդրի հետ կապված գլոբալ հարցը, քանի որ բոլոր ոլորտներում էլ պետությունը հստակ պարտավորություններ ունի, և կարևոր է հասկանալ, թե պարտավորությունների որ մասն է կատարվում, որը չի կատարվում, և ինչ ձևով է հնարավոր երաշխավորել դրանց կատարումը,- ասաց ՄԻՊ-ը և հավելեց,- Դրանից բացի, նաև ուսումնասիրում ենք մյուս կտորը, որը վերաբերում է տարբեր իրավապահ մարմինների հետ կապված գործողություններին վերաբերելի հարցերին»։
Անահիտ Մանասյանը վստահեցրեց՝ ամբողջական ուսումնասիրություններից հետո հանդես են գալու հստակ առաջարկներով, և, եթե կարիք լինի, տարբեր պետական մարմինների գործողությունների հետ կապված գնահատականներով։
