Երբեք չեմ մոռանա դպրոցի բակային խաղերը, որոնք խաղում էինք. Կանադայի վարչապետը` դերասան Մեթյու Փերիի մասին
Կանադայի վարչապետ Ջասթին Թրյուդոն ցավակցել է իր դպրոցական ընկերոջ՝ հայտնի դերասան Մեթյու Փերիի անսպասելի մահվան կապակցությամբ: Այս մասին գրում է Daily Mail-ը՝ մանրամասնելով, որ Թրյուդոն և Փերին նույն դպրոցում են սովորել:
Սոցցանցերում արված գրառման մեջ Թրյուդոն նշել է. «Մեթյու Փերիի մահը ցնցող և տխուր է: Ես երբեք չեմ մոռանա դպրոցի բակային խաղերը, որոնք մենք խաղում էինք, և ես գիտեմ, որ մարդիկ ամբողջ աշխարհում երբեք չեն մոռանա այն ուրախությունը, որը նա պարգևել է իրենց: Շնորհակալություն բոլոր ծիծաղների համար, Մեթյու։ Քեզ սիրել են, և քեզ կկարոտեն»:
Մի քանի տարի առաջ Փերին Ջիմի Քիմելի շոուի ժամանակ բացահայտել էր, որ ինքը և իր մյուս ընկերը դպրոցում ծեծել էին Թրյուդոյին:
Հիշեցնենք, որ 54 տարեկանում կյանքից հեռացել է 1990-ականների հանրահայտ «Ընկերներ» (Friends) սերիալի աստղ Մեթյու Փերին. նրան հայտնաբերել են տանը՝ «ջակուզիում խեղդված»:
