Պայմանավորվածություն է ձեռք բերվել Իրանի տարածքով դեպի Նախիջևան տանող ճանապարհի և երկաթգծի կառուցման վերաբերյալ. Ալիև
Պայմանավորվածություն է ձեռք բերվել Իրանի տարածքով դեպի Նախիջևան տանող ճանապարհի և երկաթգծի կառուցման վերաբերյալ: Ըստ ԱՊԱ գործակալության, այս մասին ասված է Ադրբեջանի նախագահ Ալիևի՝ Շուշիում ընթացող Տնտեսական համագործակցության կազմակերպության նախարարների խորհրդի 27-րդ նիստի մասնակիցներին ուղղված ուղերձում։
«Ադրբեջանը նաև հուսալի տարանցիկ երկիր է, և մեր տրանսպորտային և լոգիստիկ ենթակառուցվածքը բաց է կազմակերպության անդամ բոլոր երկրների համար։
Հաշվի առնելով Արևելք-Արևմուտք ճանապարհով բեռնափոխադրումների աճող պահանջարկը, մենք նպատակ ունենք Բաքու-Թբիլիսի-Կարս երկաթուղով փոխադրվող բեռների ծավալը 1 միլիոն տոննայից հասցնել 5 միլիոն տոննայի:
Իրանի հետ պայմանավորվածություն է ձեռք բերվել նաև ճանապարհի և երկաթգծի կառուցման վերաբերյալ, որը հնարավորություն կտա Իրանի Իսլամական Հանրապետության տարածքով մուտք գործել Նախիջևանի Ինքնավար Հանրապետություն։
Ադրբեջանն ակտիվորեն աշխատում է նաև Հյուսիս-Հարավ տրանսպորտային միջանցքի կարողությունների հետագա ընդլայնման ուղղությամբ»,- ասել է պետության ղեկավարը։
Նշենք, որ Տնտեսական համագործակցության կազմակերպությունը հիմնադրվել է 1985 թվականին Թուրքիայի, Իրանի և Պակիստանի կողմից։ 1992 թվականի նոյեմբերի 28-ին ԷԿՕ-ին միացան 7 երկրներ։ Ներկայումս կազմակերպության մեջ մտնում են 10 երկրներ՝ Ադրբեջան, Աֆղանստան, Իրան, Ղազախստան, Ղրղզստան, Ուզբեկստան, Պակիստան, Տաջիկստան, Թուրքիա, Թուրքմենստան։
