ՀՀ էկոնոմիկայի փոխնախարարը հանդիպել է Լեռնային Ղարաբաղից բռնի տեղահանված գործարարների հետ
Էկոնոմիկայի նախարարի տեղակալ Ռաֆայել Գևորգյանի գլխավորությամբ հոկտեմբերի 9-ին Լեռնային Ղարաբաղից բռնի տեղահանված գործարարների հետ կայացել է հանդիպում, որի ընթացքում նախարարի տեղակալը ներկայացրել է տնտեսության ոլորտում գործող ծրագրերը և այդ ծրագրերից օգտվելու՝ իրենց համար մշակված շահավետ պայմանները: Հանդիպմանը ներկա են եղել նաև «Մանթաշյանց» գործարարների միության Լեռնային Ղարաբաղի և Հայաստանի Հանրապետության անդամները։
ՀՀ էկոնոմիկայի նախարարության «Ֆեյսբուք»-ի էջը տեղեկացնում է, որ հանդիպման ընթացքում հարցեր են հնչել ԼՂ-ում գրանցված ընկերությունների վերագրանցման, տարբեր ոլորտներում գործունեություն իրականացնելու համար նոր լիցենզիաների տրամադրման, նոր հողակտորների ձեռքբերման, գյուղոլորտի տարբեր ծրագրերից օգտվելու կարգի, բանկային համակարգի հետ կապված մի շարք խնդիրների վերաբերյալ։
Ըստ աղբյուրի՝ Ռաֆայել Գևորգյանը պատասխանել է բարձրացված հարցերին և հավելել, որ այլ գերատեսչությունների հետ քննարկելուց հետո էկոնոմիկայի նախարարությունը կարձագանքի նաև այս փուլում անպատասխան մնացած հարցերին։
