ՀայՓոստը կտրուկ իջեցնում է Եվրոպա առաքվող ծանրոցների սակագները
ՀայՓոստը դեպի Եվրոպա փոստփոխանակման ուղղություններում կտրուկ իջեցնում է ծանրոցների սակագները: Գնիջեցումը հաջողվել է իրականացնել լոգիստիկ նոր երթուղիների կիրառման, փոստփոխանակման գործընթացների օպտիմալացման, ինչպես նաև միջազգային գործընկերների հետ բանակցությունների արդյունքում: Այս մասին հաղորդագրություն է տարածել ՀայՓոստ ընկերությունը։
«Օրինակ, եթե մեկ շաբաթ առաջ դեպի Ֆրանսիա կամ Գերմանիա հասցեագրված 20կգ ծանրոցի առաքման ընդհանուր արժեքը կազմում էր 128,900 ՀՀ դրամ, ապա այժմ նույն քաշով ծանրոցը կարելի է ուղարկել՝ վճարելով ընդամենը 57,500 ՀՀ դրամ, իսկ 5 կգ ծանրոցի առաքումը 39,100 ՀՀ դրամից դարձել է 20,000 ՀՀ դրամ»,- ասված է հաղորդագրության մեջ:
Ինչպես նշել է ՀայՓոստի գլխավոր գործադիր տնօրեն Արայիկ Աբրահամյանը, բանակցությունների շնորհիվ ՀայՓոստը իջեցնում է դեպի Եվրոպա փոստփոխանակման ուղղություններում ծանրոցների սակագները: Ծանրոցների առաքումն իրականացվում է օդային եղանակով, որի շնորհիվ բարելավվել է նաև փոստփոխանակման որակը:
Էականորեն կրճատվել են նաև փոստփոխանակման ժամկետները։ Եվրոպական թոփ ուղղությունների դեպքում, ինչպիսիք են օրինակ Ֆրանսիան, Գերմանիան, Բելգիան, Ավստրիան, միջին առաքման ժամկետը կազմում է 7-10 օր։
Միևնույն ժամանակ բարելավվել է ներհանրապետական փոստփոխանակման որակը: Այժմ 80%-ից ավել առաքանիները Հայաստան մուտք գործելուց հետո հասնում են իրենց հասցեատերերին ընդամենը 2 օրվա ընթացքում։
