Հետագա ինտեգրման հարցում ԵԱՏՄ անդամ պետությունների դիրքորոշումները մի փոքր տարբերվում են․ Փաշինյան
Չնայած բոլոր մարտահրավերներին և միջազգային բարդ իրավիճակին՝ Եվրասիական տնտեսական միությունը լավ զարգանում է։ Եվրասիական միջկառավարական խորհրդի նիստին այս մասին ասաց ՀՀ վարչապետ Նիկոլ Փաշինյանը։
Վարչապետը նշեց, որ Եվրասիական տնտեսական միության ներսում ապրանքաշրջանառությունը կայուն տեմպերով աճում է։ Փաշինյանը այս հանգամանքը դրական ձեռքբերումներից մեկն է համարում։
«Կարծում եմ, որ իսկապես տնտեսությունը շատ կարևոր է։ Մենք այժմ կենտրոնացած ենք ԵԱՏՄ-ի 2020-25 թվականների զարգացման ռազմավարության իրականացման վրա։ Մենք այժմ աշխատում ենք մի նախագծի վրա, այն է՝ Ռուսաստանի Դաշնության կողմից առաջարկած Սանկտ Պետերբուրգի հռչակագիրը։ Իհարկե, սա շատ հետաքրքիր նախագիծ է, և շատ դրույթներ ընդունելի են։ Կարծում եմ ՝ դրական տրամադրվածություն կա նախագծի վերաբերյալ, բայց կան նրբություններ, որոնք պետք է քննարկենք»,- ասաց Փաշինյանը։
Փաշինյանի խոսքով՝ ԵԱՏՄ անդամ պետությունների դիրքորոշումները հետագա ինտեգրման հարցում մի փոքր տարբերվում են։
«Ընդհանուր առմամբ, հնարավորություն կա գտնելու կոնկրետ լուծում և շատ դրական է, որ մեր բոլոր գործընկերները դրական են տրամադրված։ Եվրասիական տնտեսական միության հետագա զարգացման հետ կապված շատ նրբություններ կան, շատ սկզբունքային նշանակություն ունի գազի, էներգետիկ ընդհանուր շուկայի ստեղծումը, մեր կառավարությունների վարկային, ֆինանսական քաղաքականության համակարգումը։ Մենք նույնպես շատ սերտորեն աշխատում ենք այս հարցում: Մեր գլխավոր նպատակն է զարգացնել մեր երկրների տնտեսությունները, բարձրացնել մեր քաղաքացիների բարեկեցության մակարդակը։ Կարծում եմ, որ այս ոլորտում Եվրասիական տնտեսական միությունը շատ մեծ հետաքրքրություն ունի։ Մենք տեսնում ենք որոշ ազդակներ, որոնք խոսում են այն մասին, որ մյուս երկրները ևս շահագրգռված են Եվրասիական տնտեսական միության հետ հարաբերությունների հետագա զարգացմամբ»,- եզրափակեց Փաշինյանը։
