Հնդկաստանում հորդառատ անձրևների հետևանքով զոհերի թիվը հասել է 66-ի

Հնդկաստանում առնվազն 66 մարդ է զոհվել երկրի հյուսիսում հորդառատ անձրևներից առաջացած ավերածությունների հետևանքով: Այս մասին հաղորդում է India Today պարբերականը։

Հնդկաստանի հյուսիսային Հիմաչալ Փրադեշի և Ութարաքհանդ նահանգներում օգոստոսի 13-ին և 14-ին հորդառատ անձրևներ են տեղացել: Դրանք հանգեցրել են սողանքների և տների փլուզման։

Երկու նահանգներում առատ տեղումների պատճառով փակ է ճանապարհների մի մասը։ Տեղի իշխանությունները զբոսաշրջիկներին խորհուրդ են տալիս առաջիկա օրերին զերծ մնալ տուժած շրջաններ մեկնելուց։ Օդերևութաբանները տարածաշրջանում անձրևային եղանակ են կանխատեսում մինչև օգոստոսի 19-ը։

Օգոստոսի 16-ին Հիմաչալ Փրադեշում սաստիկ տեղատարափների պատճառով փակվել են բոլոր ուսումնական հաստատությունները։

Նահանգի գլխավոր նախարարը հայտարարել է, որ վերջին մի քանի օրվա ընթացքում տեղումների քանակի գրեթե 157 տոկոսով աճը զգալի տնտեսական վնաս է պատճառել: Հիմաչալ Փրադեշի վարչակազմը Հնդկաստանի կառավարությանը կոչ է արել նահանգը հայտարարել աղետի գոտի և շտապ օգնություն տրամադրել տարերքի հարվածի հետևանքները վերացնելու համար։